Pellissierhuis
Die Pellissierhuis in Bethulie is een van die oudste huise van blankes noord van die Oranjerivier. Dit huisves die dorp se museum.
Huis
[wysig | wysig bron]Die middelste gedeelte van die huis is in 1834 deur die sendeling-ambagsman C. Gosselin vir eerw. Jean Pierre Pellissier van die Paryse Evangeliese Sendinggenootskap gebou. In 1853 en weer in 1856 is die huis vergroot. Dit het verskeie slaapkamers, ‘n ruim voorhuis, besonder dik gewelmure en ‘n rietdak. Mabel Jansen en dr. Henri Pellissier, twee kleinkinders van die sendeling, het die huis in 1956 aan die dorp geskenk om die museum te huisves. In 1958 is die huis tot gedenkwaardigheid verklaar as monument vir die vroegste Christelike sendingwerk in die kontrei.
Museum
[wysig | wysig bron]In die versameling word klem gelê op die vroeë sendingwerk van Pellissier onder die Ba'Thlapingstam van opperhoof Lepui. Daar is klere, dokumente, foto’s, gebruiksvoorwerpe en landbougereedskap uit die 19de eeu sowel as sekere persoonlike artikels van Pellissier en items uit die Tweede Vryheidsoorlog. Die museum is op 20 Julie 1979 geopen.
Bbliografie
[wysig | wysig bron]- Fransen, Hans (samesteller): Guide to the museums of Southern Africa. Kaapstad: Southern African Museums Association, 1978.
- Oberholster, J.J.: Die historiese monumente van Suid-Afrika. Kaapstad: Kultuurstigting Rembrandt van Rijn vir die Raad vir Nasionale Gedenkwaardighede, 1972.