Peter Schmeichel

Peter Schmeichel

Schmeichel in 2012
Persoonlike inligting
Geboortedatum	18 November 1963 (1963-11-18)
Geboorteplek	Gladsaxe, Denemarke
Lengte	1,93 m
Speelposisie	Doelwagter
Jeugloopbaan
1972–1975	Høje-Gladsaxe
1975–1979	Hero
1979–1981	Gladsaxe-Hero
Seniorloopbaan*
Jare	Span	Kere†	(Doele)†
1981–1984	Gladsaxe-Hero	46	(0)
1984–1987	Hvidovre	78	(6)
1987–1991	Brøndby	119	(2)
1991–1999	Manchester United	292	(1)
1999–2001	Sporting CP	55	(0)
2001–2002	Aston Villa	29	(1)
2002–2003	Manchester City	29	(0)
Totaal		648	(9)
Nasionale span
1987–2001	Denemarke	129	(1)
* Kere vir seniorklub uitgedraf en doele is net vir die plaaslike liga.. † Kere uitgedraf (Doele).

Peter Bolesław Schmeichel (gebore 18 November 1963) is ’n Deense voormalige professionele sokkerspeler wat as doelwagter gespeel het. Gedurende agt seisoene by die Engelse klub Manchester United het hy 15 trofeë gewen, insluitend vyf Premierliga-titels, drie FA-bekers, en hy was die kaptein van die span wat die klub tot oorwinning in die 1999 UEFA Champions League-eindstryd gelei het om The Treble te voltooi. Schmeichel het ook vir die Deense nasionale span gespeel, met wie hy die Europese Kampioenskap in 1992 gewen het. Hy word beskou as een van die beste doelwagters van alle tye, en is in 1992 en 1993 aangewys as die IFFHS Wêreldbeste Doelwagter, terwyl die Internasionale Federasie vir Sokker Geskiedenis en Statistiek hom onder die top tien doelwagters van die 20ste eeu gelys het.

Schmeichel is gebore in Gladsaxe, Kopenhagen. Hy is 1,93 m lank en het gedurende sy speeldae byna 100 kg geweeg, en het spesiaal vervaardigde XXXL-sokkertruie gedra. As ’n meedoënlose mededinger, het hy dikwels sy verdedigers hardop gekritiseer wanneer hy foute in hul spel opgemerk het. Ongewoon vir ’n doelwagter, het hy 11 doele in sy loopbaan aangeteken, insluitend een vir die nasionale span. Hy was ook die speler met die meeste wedstryde vir die Deense nasionale span – 129 tussen 1987 en 2001 – totdat Simon Kjær hom in 2023 verbygesteek het. Benewens die Europese Kampionskap in 1992, het hy ook vir sy land gespeel by die 1998 FIFA Wêreldbeker en drie bykomende Europese Kampioenskap-toernooie. Hy was 30 keer kaptein van die nasionale span.

Hy het ook klubs soos Gladsaxe-Hero, Hvidovre, Brøndby, Sporting CP, Aston Villa en Manchester City verteenwoordig in ’n loopbaan wat van 1981 tot 2003 gestrek het en 24 trofeë opgelewer het.

In 2001 het Schmeichel ’n openbare peiling wat deur Reuters gehou is gewen, waarin die meerderheid van die 200 000 deelnemers hom as die beste doelwagter ooit aangewys het, voor Lef Jasjin en Gordon Banks. In 2003 is hy opgeneem in die Engelse Sokker-eregalery as erkenning vir sy invloed op die Engelse spel. In Maart 2004 is hy aangewys as een van die "125 grootste lewende sokkerspelers" tydens die FIFA 100-vieringe.

Schmeichel se seun, Kasper, is ook ’n professionele doelwagter, tans speel hy vir die Skotse span Celtic en die Deense nasionale span.