Petronel Malan
Petronel Malan | |
|---|---|
| Gebore | 1974 Pretoria, Suid-Afrika |
| Genres | Klassieke musiek |
| Beroep(e) | Konsertpianis |
| Instrumente | Klavier |
| Etikette | Hänssler Classic |
| Webwerf | www |
Petronel Malan is in 1974 in Pretoria, Suid-Afrika gebore.[1] Sy is 'n Suid-Afrikaanse konsertpianis wat in die Verenigde State woon.
Sy is 'n Grammy-genomineerde Suid-Afrikaanse pianis en 'n eksklusiewe opname-kunstenaar vir die internasionaal-erkende plaatetiket Hänssler Classic in Duitsland. Haar debuutalbum, Transfigured Bach: The Complete Bach Transcriptions of Bartók, Lipatti and Ignaz Friedman, is genomineer vir drie Grammy toekennings, waaronder "Beste instrumentale solo-album". Die album was langer as 30 weke op die Top-10-lys van Classic FM en het kritiese lof ontvang. Haar tweede opname in die reeks, Transfigured Mozart, is in 2006 vrygestel tydens 'n 15-konsert-toer in Suid-Afrika ter herdenking van die 250ste herdenking van Mozart se geboorte. Transfigured Beethoven is in 2008 vrygestel. Transfigured Tchaikovsky (2012) bevat die liedereverwerkings van Isaac Mikhnovsky. In 2015 het sy Transfigured Brahms vrygestel, wat die heel eerste verwerkings van dié werke deur die Amerikaanse komponis Lowell Liebermann insluit. As 'n Blüthner-kunstenaar maak sy uitsluitlik van die klaviere gebruik vir haar opnames.
Agtergrond[wysig | wysig bron]
Malan is in Suid-Afrika gebore. Haar voorouers is Franse Hugenote wat in 1688 voet aan wal in die Kaap gesit het. Sy het op vierjarige ouderdom klavierlesse by haar ma, 'n operasangeres, begin neem. Sy word beskou as die "laaste wonderkind" van die ontslape Suid-Afrikaanse pedagoog Adolph Hallis, en het op tienjarige ouderdom haar debuut by die Johannesburgse Simfonieorkes gemaak. Malan het haar eerste nasionale goue medalje op twaalfjarige ouderdom verower (ATKV Prelude Kompetisies) en haar eerste internasionale goue medalje op veertienjarige ouderdom tydens die Derde Internasionale Klavierkompetisie in Marsala, Sisilië. Nadat sy elke kompetisie gewen het waarvoor sy in Suid-Afrika kon inskryf, het sy die voorste Suid-Afrikaanse pianis van haar generasie geword toe sy die jongste persoon geword het wat die gesogte SAUK-musiekprys-kompetisie kon wen. Sy het na die Verenigde State verhuis ten einde haar loopbaan na te jaag.
Sy het haar studies voortgesit onder Joseph Stanford, Steven De Groote, Ralph Votapek en Earl Wild. Petronel het beide haar meesters- doktorale graad in musiek aan die University of North Texas College of Music voltooi en onder Joseph Banowetz studeer.
Na haar Europese debuut in 1988 in Rome het sy voortgegaan om wêreldwyd orkes-, solo- en kamermusiek-uitvoerings te gee. Van die hoogtepunte in haar loopbaan sluit uitvoerings in by gesogte liggings soos die Carnegie Recital Hall, die Salle Cortot en die Théâtre du Châtelet in Parys, die Mozarteum in Salzburg, die Liszt Museum in Boedapest, die Kravis Center in West Palm Beach, die Orchestra Hall in Chicago en die Bass Hall in Fort Worth asook uitvoerings in Sint Petersburg, Rusland. Haar fees-optredes sluit onder meer uitvoerings tydens die Gilmore Klavier-fees, die Jasper-musiekfees, die Great Romantics-fees, Ravinia-fees, die Levočské Babie Leto-fees in Slowakye, en die Music in the Mountains-fees in Colorado, in. Sy het saam met dirigente soos Vasily Petrenko, Bernhard Gueller, Karina Canellakis, Daniel Boico, Dmitry Manilov, Omri Hadari, Yashima Takeda, Bernhard Gueller en Fuzao Kajima gewerk. Haar uitvoerings en verskynings vir televisie, radio en die web sluit regstreekse uitvoerings in Europa, Kanada, die VSA en verskeie dokumentêre televisieprogramme in Suid-Afrika in.
Sy handhaaf 'n volledige skedule dwarsoor die wêreld as solis, orkes-solis en kamermusikus. Sy beoordeel gereeld klavierkompetisies en bied ook gereeld meesterklasse en lesings aan in die Verenigde State en Suid-Afrika.
Toekennings[wysig | wysig bron]
In 2000 is vier goue medaljes aan haar toegeken tydens die Louise McMahon Internasionale Musiekkompetisie, die Missouri Southern International Piano Competition, die Hilton Head International Piano Competition en die Los Angeles Liszt-kompetisie "Budapest Concert". Sy was ook 'n groot pryswenner tydens die Web Concert Hall Competition van 2000 (www.webconcerthall.com) en 'n goue medalje wenner tydens die Young Texas Artist Competition en die Grace Welsh Piano Prize, om maar 'n paar te noem.
In 2003 is sy bekroon met die nasionale Rapport/City Press Prestige-toekenning as een van die "10 mees inspirerende vroue-presteerders" in Suid-Afrika.
In 2006 het sy die Kanna-prys vir haar uitverkoopte uitvoerings tydens die KKNK op Oudtshoorn gewen. Die Kannas word ook die "Karoo Oscars" genoem.
In 2012 het sy die Young Alumni-toekenning van die Universiteit van Noord-Texas gewen. [2]
In 2013 is die "The American Prize" aan haar toegeken vir haar opname getitel "Transfigured Tchaikovsky."
In 2014 het sy die kykNet Fiesta-toekenning ontvang wat toegeken is aan die beste lewendige uitvoering tydens 'n nasionale kunstefees in die kategorie: Klassieke musiek.[3]
Opnames op Blüthner[wysig | wysig bron]
Malan is 'n eksklusiewe kunstenaar vir Blüthner, en maak uitsluitlik van dié instrumente gebruik vir haar opnames. Sy besit verskeie klaviere, waaronder 'n konsertgrootte Blüthner.
Bondige diskografie[wysig | wysig bron]
- Transfigured Bach: The Bach Transcriptions of Bartók, Lipatti and Friedman, Hännsler Classic [4]
- Transfigured Mozart, Hännsler Classic. [5]
- Transfigured Beethoven, Hännsler Classic
- Transfigured Tchaikovsky, Hännsler Classic
- Transfigured Brahms, Hännsler Classic
Eksterne skakels[wysig | wysig bron]
- Petronel Malan se amptelike webblad
- "MozartCircle Interview: 10 Questions with Petronel Malan". 1 Julie 2017.
- Bach kantates webwerf artikel oor Petronel Malan
- Petronel Malan diskografie vir Hännsler Classic
- Youtube video: Petronel Malan: Haydn Klaviersonate in C majeur Hob XVI/ 50, Iste Bew.
Verwysings[wysig | wysig bron]
- ↑ http://www.bach-cantatas.com/Bio/Malan-Petronel.htm Opgespoor en besoek op 25 Mei 2020
- ↑ https://northtexan.unt.edu/content/soaring-eagles-alumni-awards-2012 Opgespoor en besoek op 25 Mei 2020
- ↑ https://web.archive.org/web/20170116144034/http://kyknet.dstv.com/2014/02/14/plaaslike-sterre-blink-uit-by-die-fiestas/ https://web.archive.org/web/20170116143519/http://kyknet.dstv.com/2014/01/01/fiestas-2014-genomineerdes/ Opgespoor en besoek op 25 Mei 2020
- ↑ https://www.allmusic.com/album/transfigured-bach-the-bach-transcriptions-of-bartók-lipatti-and-friedman-mw0001845178 Resensie: "Hierdie verwerkings of rangskikkings deur Ignaz Friedman, Dinu Lipatti, en Béla Bartók van J.S. Bach se werke val êrens in die middel van die uiterstes van 'n eenvoudige oordrag van note van een instrumentvorm na 'n ander, en 'n volledige verwerking van oorspronklike musikale idees. Friedman se verwerkings is beslis romanties van aard. Die Toccata en Fuga in D mineur herinner aan Stokowski se orkestrasie van dieselfde werk. Net soos Stokowski gebruik gemaak het van die beskikbare timbres in die verskillende instrumente, benut Friedman op sy beurt die eienskappe van die klavier, veral van die vinnige herhaling van note. Die uittreksels uit die solo vioolpartitas is interessant, aangesien 'n enkele reël musiek omskep word in 'n komplekse mengsel van melodie en harmonie. Die Gavotte van die Partita nr. 3 is grandioos, met vreemde harmonieë wat ingemeng word om dit boeiend en anders te maak. Bartók meng ook met geleentheid ekstra harmonie in die Orrelsonate nr. 6 in, alhoewel daar genoeg is vir twee hande om te verrig wanneer die orrel-pedaallyn eers bygevoeg word. Malan se uitvoering is nie foutloos nie, en dit klink soms asof haar hande nie heeltemal groot genoeg is om al die nodige note te dek nie, maar tegnies gee sy 'n uiters waardevolle interpretasie. Sy reageer met musikaliteit op die dramatiese, romantiese aard van die verwerkings, sonder om dit egter te oordoen, veral in Lipatti se rangskikking van die Pastorale, wat self 'n wesenlik meer eenvoudige verwerking as die ander stukke is. Bach se oorspronklike musikale bedoeling tree sterk na vore daarin. Dit is die eerste opname van sommige van hierdie rangskikkings, en dit is goed dat hulle nie vir ewig verlore gaan soos ander konsertpianiste se herinterpretasies van vroeëre werke nie." Opgespoor en besoek op 25 Mei 2020
- ↑ https://www.allmusic.com/album/transfigured-mozart-mw0001841661 . Resensie: " 'Transfigured Mozart?' ... Met ignorering van die oorspronklike werke, óf dan ten minste die bekendste verwerkings, het die Suid-Afrikaanse pianis Petronel Malan verwerkings gekies wat die musiek van Mozart radikaal transformeer. Van Johann Nepomuk Hummel se briljante post-klassieke Fantasina op 'n tema van Figaro, tot Sigismund Thalberg se uiters eerbiedige Larcrimose tiré du Requiem de Mozart en Reger se massiewe en virtuose Variasies en Fuga op 'n tema van WA Mozart- die tema synde Mozart se tema vir die reeks variasies waarmee sy beroemde klaviersonate in A majeur begin- het Malan werke opgegrawe wat ons toelaat om Mozart asof van nuut af aan te hoor. Malan voer die stukke uit met 'n vlekkelose tegniek- geen maklike prestasie om te behaal in Reger se uitdagende fuga nie, met 'n omvattende toon (wat alles bevat- van die mees ingehoue pianissimo tot die dikste teksture) en onbedaarlike vrygewigheid. Joachim Raff se Souvenirs de Don Giovanni is miskien nie die mees grandiose stuk musiek wat ooit gekomponeer is nie, maar jy sal dit nooit uit Malan se simpatieke uitvoering bespeur nie. 'Transfigured Mozart', wat in die Mozart-jaar van 2006 vrygestel is, kom as 'n verligting vir diegene wat reeds oor meer as genoeg opnames uit die standaard Mozart-repertorium beskik, en as 'n vreugde vir diegene wat klavierspel van die grootste kaliber koester." Opgespoor en besoek op 25 Mei 2020
Normdata  |
|
|---|