Pieter Coetsee

in Wikipedia, die vrye ensiklopedie
Jump to navigation Jump to search

Pieter Johannes Hendrik Coetsee (Burgersdorp, Kaapkolonie, 24 April 1889Johannesburg, Transvaal, Suid-Afrika, 15 Mei 1964) was ’n onderwyser, toneelmens en een van die eerste Afrikaanse omroepers.

Pieter Coetsee is in die Noordoos-Kaap as seun van ’n Kaapse rebel gebore in die dae toe ds. M.P.A. Coetsee jr. leraar was van die plaaslike Gereformeerde kerk en proff. Dirk Postma en Jan Lion Cachet die dosente aan die Teologiese Skool Burgersdorp. In die moeilike jare ná die Rebellie (1914), die Eerste Wêreldoorlog (1914–'18) en die arbeidsonluste aan die Rand (1922) het oom Pieter, soos hy algemeen bekendgestaan het, waardevolle kulturele vormingswerk in die suidelike voorstede van die Goudstad verrig.

Hy was onderwyser aan die Turffonteinse Afrikaansmediumskool, ’n kerkraadslid van die Gereformeerde kerk Johannesburg-Suid, ’n toneelmens en toegewyde afrigter van deelnemers aan die kunswedstryde van die Afrikaanse Kunsvereniging. Die Turffonteinse Asafkoor, wat later wyd bekend sou word, is in 1924 aan sy huis gestig en in die beginjare van die Afrikaanse radio was hy dikwels agter die mikrofoon. Hy het blykbaar ook in die rolprent Die bou van ’n nasie (1938) opgetree.[1]

Bronne[wysig | wysig bron]

  • (af) Malan, dr. Jacques P. 1980. Suid-Afrikaanse Musiekensiklopedie, deel I. Kaapstad: Oxford University Press.
  • (af) Swart, prof. dr. M.J. (voors.). 1980. Afrikaanse Kultuuralmanak. Aucklandpark: Federasie van Afrikaanse Kultuurvereniginge.

Verwysings[wysig | wysig bron]

  1. (af) Die argivering van die Afrikaanse film (1916–2014). URL besoek op 17 November 2016.