Pollok House

Pollok House
Pollok Country Park, Glasgow

Skotland
Verenigde Koninkryk

Voltooiing
1752

Styl
Palladiaans-Georgiaans

Argitek
William Adam

Openbare vervoer
Pollokshaws West-stasie (ScotRail)

Pollok House is 'n herehuis (stately home) in Pollok Country Park, geleë aan die suidelike stadsrand van Glasgow, wat tans namens die Stadsraad van Glasgow deur die National Trust for Scotland bestuur word. Pollok House vorm saam met die ommuurde tuin, wat rondom die herehuis aangelê is, en die omringende land Pollok Country Park wat in 1966 deur Dame Anne Maxwell McDonald aan die Stad Glasgow geskenk is en tans gewild is by stappers en drawwers. Die herehuis se boonste tweede verdieping dien steeds as woning vir lede van die Maxwell-familie tydens hul besoeke aan Glasgow en is - in teenstelling met die res van die herehuis - nie toeganklik vir die publiek nie.

Pollok het ses eeue lank as herewoning van die Maxwell-familie gedien, alhoewel die grootste deel van die huidige herehuis eers teen die middel van die 18de eeu in die Georgiaanse styl ontstaan het. Uitbreidings is in die vroeë 20ste eeu bygevoeg.^[1] In 1931 het Sir John Sterling Maxwell tydens 'n vergadering in Pollok House die National Trust for Scotland in die lewe geroep. Die kamer, waarin die stigterslede vergader het, mag besigtig word.

Pollok House staan oop vir die publiek en gee besoekers 'n outentieke smakie van die adellike leefstyl tussen die Edwardiaanse tydperk en die 1930's, met destydse meubilering in die privaat vertrekke, 'n elegante gang wat met mahoniehout en marmer afgewerk is, 'n biblioteek met 7 000 boeke en die uitgestrekte bediendekwartiere benede. In die huis se beste dae voor die Groot Oorlog het 48 bediendes drie Maxwell-familielede versorg.^[2]

Versamelings van antieke meubels, silwerware en keramiek word in Pollok House vertoon. Die herehuis huisves ook Sir William Stirling-Maxwell se kunsversameling wat op Spaanse skilderkuns fokus, met werke van El Greco (waaronder Lady in a Fur Wrap - 'n vermeende El Greco-portretskildery wat intussen aan 'n ander skilder toegeskryf word), Francisco Goya en Bartolomé Esteban Murillo, portrette van heersers uit die Huis van Habsburg en godsdienstige visioenêre werke van William Blake soos The Canterbury Pilgrims (1808). Privaat versamelings met Spaanse skilderkuns is 'n uitsondering in Britse herehuise omrede adellikes vroeër meestal op kuns uit lande gefokus het wat deel uitmaak van die klassieke Grand Tour.

Uitstallings[wysig | wysig bron]

Die eerste verdieping dien as uitstallingsruimte. Vanaf 19 Mei 2018 word 'n uitstalling aan die fotograaf Harry Benson, 'n boorling van Glasgow, gewy.^[3]^[4]