Ponte-toringgebou

in Wikipedia, die vrye ensiklopedie
Jump to navigation Jump to search
Ponte-toringgebou Ponte City

Verdiepings
54 (bogronds)


Voltooiing

1976


Argitekte
Mannie Feldman · Manfred Hermer
Rodney Grosskopff


Opdraggewer
Nasou Bpk.


Straatadres

1 Lily Avenue / Lilylaan
Berea
Johannesburg


Argitektoniese inspirasie

Marina City Towers, Chicago


Boustyl

Brutalisme

Die Ponte-toringgebou in Berea, Johannesburg
Die Marina City-toringgebou in Chicago (voltooi in 1964) was die inspirasie vir Ponte City

Die Ponte-toringgebou (ook bekend in Engels as Ponte City Apartments) is 'n 54-verdieping hoë residensiële wolkekrabber in Berea, digby Hillbrow, Johannesburg, Suid-Afrika. Met 'n hoogte van 173 meter is dit tans die tweede hoogste gebou in Suid-Afrika en derde hoogste in Afrika. Die gebou in die brutalistiese styl is in 1976 voltooi en bemark as een van die beste adresse in die Goudstad. Die ses dakwoonstelle het oor wynkelders, sweetbaddens, patio's met braaiplekke en privaat uitsigdekke beskik.

Die argitek Rodney Grosskopf was 29 jaar oud toe hy die Ponte-toringgebou ontwerp het, met die Marina City-toringgebou in Chicago as sy inspirasie. Oorspronklik was hy van plan om twee Ponte-toringgeboue naas mekaar op te rig wat as 'n soort "poort tot die Goudstad" sou dien.

In 1995, toe die gebou die slagoffer geword het van stedelike verval, prostitusie en dwelmhandel, maar - voordat dit beveilig is - ook tientalle kere deur selfmoordenaars gekies is as hul finale vertrekpunt (die gebou het toe as Suid-Afrika se Suicide Central bekendgestaan, met 63 gedokumenteerde selfmoorde[1]), het die vragwa- en logistiekonderneming Kempston Group die silindriese toringgebou gekoop. 'n Beplande verkoop aan en herontwikkeling deur David Selvan en Nour Addine Ayyoub is in 2008 weens die uitwerkings van die wêreldwye finansiële krisis gestaak. Woonstelle word tans teen bekostigbare pryse verhuur.[2]

Tans dra die kroon reg rondom 'n reuse neonverligte advertensiebord, die grootste in die Suidelike Halfrond, wat Vodacom in rooi bemark (voorheen in blou), nadat dit etlike jare lank Coca-Cola in rooi vertoon het.

Vanaf 2011 het die Ponte-toringgebou 'n soort simbool vir Johannesburg se stedelike regenerasie geword nadat Kempston Group die meeste van die wolkekrabber se 54 verdiepings laat herstel het. Elke verdieping is van 2 km se nuwe elektriese drade en sanitêre pype voorsien, terwyl ook agt hysbakke in die gebou herstel is. Tans huisves die toringgebou sowat 3 000 bewoners uit die werkers- en middelklas met verskillende agtergronde, onder wie studente, jong professionele en immigrante uit Afrikalande soos Kongo, Nigerië en Zimbabwe.[3]

Ponte-toringgebou in Berea, Johannesburg

Verwysings[wysig | wysig bron]

  1. IOL, 13 Januarie 2014: Man jumps off Joburg skyscraper. Besoek op 25 April 2016
  2. Nele Dechmann, Fabian Jaggi, Katrin Murbach en Nicola Ruffo: Up, Up. Stories of Johannesburg's Highrises. Ostfildern: Hatje Cantz 2016. Braamfontein, Johannesburg: Fourthwall Books 2016, bl. 189
  3. David Smith: Johannesburg's Ponte City: 'the tallest and grandest urban slum in the world' – a history of cities in 50 buildings, day 33. In: The Guardian, 11 Mei 2005. Besoek op 18 Junie 2017


Duitse persberigte

Koördinate: 26°11′26″S 28°3′25″O / 26.19056°S 28.05694°O / -26.19056; 28.05694