Portaal:Musiek/Uitgelig/12
Maria Callas (* 2 Desember 1923, † 16 September 1977) was een van die grootste operasangers van die twintigste eeu en danksy haar verbintenis met die Griekse skeepsmagnaat Aristoteles Onassis ook een van die bekendste glanspersoonlikhede van die jare vyftig en sestig.
Cecelia Sophia Anna Maria Kalogeropolous is in New York Stad gebore, waarheen haar ouers uit Griekeland verhuis het, maar het in 1936 na Griekeland teruggekeer om sang aan die Koninklike Musiekakademie in Athene te studeer onder die befaamde Spaans-gebore sopraan Elvira de Hidalgo (1898 tot 1980). Sy het haar debuut daar in 1939 in Cavalleria Rusticana in die koninklike operahuis gemaak en mettertyd al die vername operahuise soos die Metropolitan-operahuis, Covent Garden en La Scala verower. Haar stem, hoewel nooit "mooi" in die tradisionele sin van die woord nie, het 'n byna ongekende dramatiese uitdrukkingsvermoë gehad en danksy haar veelsydigheid kon sy dramatiese sowel as liriese rolle vertolk.