Pous Leo XIV

Pous Leo XIV
Geboortenaam	Robert Francis Prevost
Pontifikaat begin	8 Mei 2025
Pontifikaat eindig
Voorganger	Franciskus
Gebore	14 September 1955 (1955-09-14) Chicago, Illinois, Verenigde State
Ander pouse genaamd Leo

Pous Leo XIV (Latyn: Leo XIV; Italiaans: Leone XIV; Engels: Pope Leo XIV; Spaans: León XIV; gebore as Robert Francis Prevost op 14 September 1955 in Chicago, Illinois, Verenigde State) is die 267ste en huidige pous van die Rooms-Katolieke Kerk, biskop van Rome en staatshoof van die Vatikaanstad. Hy is op 8 Mei 2025 verkies tydens die konklaaf wat gehou is ná die dood van pous Franciskus. Tot sy verkiesing het Robert Francis Prevost as kardinaal-diaken van Santa Monica gedien. Die naam Leo beteken "leeu".

Leo XIV is sowel die eerste Amerikaner en Peruaan wat tot hoof van die Rooms-Katolieke Kerk verkies is. Ná sy voorganger, pous Franciskus, is hy ook die tweede pous vanuit die Amerikas en die Nuwe Wêreld. Daarnaas is hy ook die sesde Augustyn en eerste sedert pous Gregorius VIII wat tot pous verkies is. Pous Leo XIV het homself genoem na pous Leo XIII (1878–1903), met sy slagspreuk nos multi in illo uno unum (Latyn vir: "In hierdie een [Christus] is ons vele een"). Hy is op 18 Mei 2025 amptelik ingehuldig, waartydens hy ook sy pontifikale vissersring ontvang het.

Robert Francis Prevost is van Franse, Italiaanse en Spaanse herkoms. Hy is Engels, Spaans, Italiaans, Frans en Portugees magtig. Hy kan ook Latyn en Duits lees.

Biografie

Pous Leo XIV is gebore as Robert Francis Prevost op 14 September 1955 in Chicago, Illinois, Verenigde State. Hy is die jongste seun van Louis Marius Prevost en Mildred Martínez. Prevost word op 19 Junie 1982 in Rome deur aartsbiskop Jean Jadot tot priester gewy. Op 12 Desember 2014 word hy titulêre biskop van Sufar. Hy word op 30 September 2023 kardinaal-priester met Santa Monica as titelkerk. Op 8 Mei 2025 volg hy pous Franciskus op. Pous Leo XIV het homself genoem na pous Leo XIII.

Kerklike loopbaan

• 19 Junie 1982 – tot priester gewy
• 12 Desember 2014 – tot biskop gewy
• 30 September 2023 – kardinaal-diaken van Santa Monica
• 8 Mei 2025 – pous van Rome

Pontifikaat

Pous Leo XIV se handtekening

Ná die dood van pous Franciskus kies die kardinale Prevost as nuwe pous na twee dae se konklaaf op 8 Mei 2025. Leo XIV is die eerste Amerikaner en as gevolg van sy tweede staatsburgerskap ook die eerste Peruaan wat tot pous verkies is. Hy is die eerste lid van die Augustynse Orde wat die amp van pous beklee.

'n Nuwe pous se naamkeuse gee dikwels 'n aanduiding van wat hy gedurende sy ampstermyn wil verteenwoordig. Leo is Latyn en beteken "leeu". Die eerste pous met dié naam was Pous Leo I (440–461), wat eerste daarop aanspraak gemaak het dat hy die apostel Petrus se verteenwoordiger op aarde is, terwyl die laaste pous met die naam Leo, pous Leo XIII, bekend geword het as "die werkers se pous", aangesien hy hom beywer het vir billike lone, werkersregte en sosiale geregtigheid.

Eksterne skakels

• (en) Biografie van pous Leo XIV op die amptelike webwerf van die Heilige Stoel
• (en) Pous Leo XIV op Twitter
• (en) Pous Leo XIV op YouTube
• (en) Inskrywing in die Catholic Hierarchy (in Engels)

• (en) "Leo XIV". Encyclopædia Britannica. Besoek op 18 Mei 2025.

Nota

Saamgestel en vertaal uit die Nederlandse, Engelse, Duitse en Franse wikipedia en aangevul uit ander bronne soos aangedui.

Opvolging

Voorafgegaan deur Miguel Angel Orcasitas Gómez	Prior-generaal van die Augustynse Orde 2001–2013	Opgevolg deur Alejandro Moral
Voorafgegaan deur Jesús Moliné Labarte	Biskop van Chiclayo 2015–2023	Opgevolg deur Edinson Edgardo Farfán Córdova OSA
Voorafgegaan deur Marc Kardinal Ouellet PSS	Prefek van die Dikastery vir Biskoppe 2023–2025	Opgevolg deur n.v.t.
Voorafgegaan deur Franciskus	Pous (Pontifex Maximus) 2025–hede	Sittend