Gaan na inhoud

Prometheus (2012-rolprent)

in Wikipedia, die vrye ensiklopedie
Prometheus
Regisseur Ridley Scott
Vervaardiger
  • David Giler
  • Walter Hill
  • Ridley Scott
Draaiboek
  • Jon Spaihts
  • Damon Lindelof
Met
Musiek deur Marc Streitenfeld
Kinematografie Dariusz Wolski
Ateljee
  • Scott Free Productions
  • Brandywine Productions
  • Dune Entertainment
Verspreider 20th Century Fox
Uitgereik 1 Junie 2012 (2012-06-01): Brittanje
8 Junie 2012 (2012-06-08): VSA
Speeltyd 124 minute[1]
Land VSA
Taal Engels
IMDb-profiel

Prometheus is wetenskapsfiksierolprent van 2012 wat deur Ridley Scott geregisseer en deur Jon Spaihts en Damon Lindelof geskryf is. Dit is die vyfde aflewering van die Alien-rolprentreeks en die akteurs sluit in Noomi Rapace, Michael Fassbender, Guy Pearce, Idris Elba, Logan Marshall-Green en Charlize Theron. Dit speel laat in die 21ste eeu af en gaan oor die bemanning van die ruimteskip Prometheus. Hulle volg 'n sterkaart wat tussen die artefakte van verskeie beskawings op Aarde gevind is en gaan soek na die oorsprong van die mensdom. Hulle kom op 'n verafgeleë wêreld aan en ontdek 'n bedreiging wat die mens kan uitwis.

Scott en die regisseur James Cameron het idees ontwikkel vir 'n voorprent vir Scott se gruprent Alien van 1979. In 2002 het die ontwkkeling van Alien vs. Predator (2004) voorrang geniet en die projek is laat vaar tot in 2009, toe Scott weer belangstelling daarin getoon het. Spaihts het 'n draaiboek vir 'n voorprent geskryf, maar Fox het van plan verander.

Laat in 2010 het Lindelof by die span aangesluit en Spaihts se draaiboek oorgeskryf as 'n storie wat nie direk met die oorspronklike reeks verband hou nie. Die prent is in Engeland, Ysland, Skotland, Jordanië en Spanje verfilm.

Dit is op 1 Junie 2012 in Brittanje uitgereik en op 8 Junie in Noord-Amerika. Dit het oor die algemeen gunstige resensies gekry; veral die ontwerpe, produksiewaardes en toneelspel is geloof. 'n Opvolg, Alien: Covenant, is in Mei 2017 uitgereik.

Rolverdeling

[wysig | wysig bron]

Storielyn

[wysig | wysig bron]

Bederwingswaarskuwing: Die storielyn en/of storie se einde volg hieronder.

Terwyl 'n ruimtetuig van 'n planeet af vertrek, drink 'n lang, buiteaardse humanoïed 'n swart vloeistof, wat meebring dat sy liggaam oplos. Sy oorblyfsels val in 'n waterval en die wese se DNS val uiteen en begin weer saamsmelt.

Prometheus se sterkaart is geïnspireer deur Joseph Wright se skildery A Philosopher Lecturing on the Orrery. (Orrery is 'n meganiese model van die Sonnestelsel.)

In 2089 ontdek die argeoloë Elizabeth Shaw en Charlie Holloway 'n sterkaart in Skotland wat ooreenstem met baie ander van verskeie onverbonde antieke kulture. Hulle vertolk dit as 'n uitnodiging van die mens se voorlopers, die "Ingenieurs". Peter Weyland, die bejaarde hoof- uitvoerende beampte van Weyland Corporation, befonds 'n ekspedisie aan boord van die ruimteskip Prometheus om die kaart te volg na die verafgeleë maan LV-223. Gedurende die vlug monitor die robot David hulle reis.

Die Prometheus land op die maan se barre, bergagtige oppervlak naby 'n groot kunsmatige struktuur. Die span verken die binnekant en ontdek steensilinders, 'n monolitiese standbeeld van 'n humanoïede kop en die onthoofde lyf van 'n groot buiteaardse wese. Shaw stel vas die liggaam is dié van 'n Ingenieur en besluit om sy kop terug te neem na die Prometheus. Die bemanning ontdek ook ander liggame, wat hulle laat aanneem dié spesie het uitgesterf. Die bemanningslede Millburn en Fifield word ongemaklik oor die vondste en probeer na die Prometheus terugkeer, maar verdwaal in die struktuur. Die ekspedisie word kortgeknip toe 'n storm die bemanning dwing om terug te keer na die ruimtetuig. David neem in die geheim 'n silindriese vaas saam met hom, terwyl 'n swart vloeistof uit die meeste sypel. In die ruimteskip se laboratorium word ontdek die Ingenieur se DNS stem ooreen met dié van 'n mens. David ondersoek die inhoud van die silinder. Hy besmet met opset 'n drankie daarmee en gee dit aan die niksvermoedende Holloway, wat dit drink. Kort daarna het hy en Shaw seks.

In die struktuur maak 'n slangagtige wese Millburn dood en besproei Fifield se helm, wat dit laat smelt. Fifield val met sy gesig in 'n poel. Toe die bemanning terugkeer, kom hulle op Millburn se lyk af. David ontdek op sy eie 'n beheerkamer met 'n oorlewende Ingenieur en 'n holografiese sterkaart met die koördinate van die Aarde beklemtoon. Intussen word Holloway vinnig al hoe sieker. Die ander jaag met hom teurg na die Prometheus, maar die sendingleier, Meredith Vickers, weier dat hy aan boord kom. Op sy aandrang brand sy hom met 'n vlamwerper dood. Later toon 'n skandering Shaw, wat voorheen onvrugbaar was, is nou ver swanger. Omdat sy die ergste vrees, gebruik Shaw 'n outomatiese operasietafel om 'n inkvisgatige wese uit haar onderlyf te trek. Daarna vind sy uit Weyland, Vickers se pa, is aan bood van die Prometheus. Hy verduidelik hy wil die Ingenieurs vra hoe om nie van ouderdom te sterf nie.

'n Monsteragtige, gemuteerde Fifield keer na die ruimteskip terug en maak verskeie bemanningslede dood voordat die skip se kaptein, Janek, hom doodmaak. Hy spekuleer teenoor Shaw die struktuur is eintlik 'n militêre basis van die Ingenieurs en dat hulle beheer oor 'n kragtige biologiese wapen verloor het. In die struktuur is ook 'n ruimtetuig. Weyland en die span keer saam met Shaw na die struktuur terug. David maak die Ingenieur uit sy halfbewustelose toestand wakker en praat met hom in 'n Proto-Indo-Europese taal.[13] Hy probeer aan hom verduidelik wat Weyland wil hê. Die Ingenieur reageer deur Weyland en sy span dood te maak en David te onthoof voordat hy die ruimtetuig reaktiveer. Shaw vlug desperaat en waarsku Janek dat die Ingenieur na die Aarde wil vlieg en alle lewensvorme uitwis. Janek en die oorblywende bemanningslede offer hulle lewe op deur met die Prometheus in die buiteaardse tuig vas te vlieg. 'n Reddingsboot word vrygestel. Vickers ontsnap, maar die buiteaardse tuig, wat ná die ongeluk buite beheer is, ry bo-oor haar.

Shaw keer na die reddingsboot terug en ontdek haar buiteaardse "kind" lewe nog en is nou so groot soos 'n reus. Die Ingenieur forseer die reddingsboot se deur oop en val Shaw aan, maar sy laat haar buiteaardse "kind" op hom los. Dit druk 'n lang eierboor in die Ingenieur se keel af en stel hom so buite aksie. Shaw kry David se oorblyfsels en beplan om saam met hom na die Ingenieurs se tuisplaneet te gaan soek om uit te vind hoekom hulle die mens wil vernietig. Met David se hulp vertrek sy in 'n ander ruimtetuig van die Ingenieurs van LV-223.

In die reddingsboot wat op die maan agtergelaat is, bars 'n woeste buiteaardse wese uit die Ingenieur se bors.

Temas

[wysig | wysig bron]

Die sentrale tema in Prometheus is die Titaniese god Prometeus van die Griekse mitologie wat die gode trotseer en aan die mensdom die gawe van vuur gee, waarvoor hy aan ewige straf onderwerp word.[4] Die gode wil die mense se skeppings beperk ingeval hulle probeer om die gode te onttroon.[14] Die rolprent handel oor die mensdom se verhouding met die gode – hulle skeppers – en die gevolge daarvan om hulle te trotseer. ’n Menslike ekspedisie beoog om hulle te vind en kennis oor geloof, onsterflikheid en die dood te ontvang. Hulle vind verhewe wesens wat in vergelyking met die mensdom goddelik voorkom, en die bemanning van die Prometheus ly gevolge vir hulle soeke.[4] Shaw is regstreeks verantwoordelik vir die gebeure van die intrige omdat sy haar godsdienstige oortuigings bevestig wil hê[15] en glo sy is geregtig op antwoorde van haar god; haar vrae bly onbeantwoord en sy word vir haar aanmatiging gestraf.[16][17] Die rolprent verskaf stukke inligting, maar laat die verbande en gevolgtrekkings aan die gehoor oor, wat moontlik die vraag onbeantwoord laat.[17] Verdere godsdienstige illusies word geïmpliseer deur die Ingenieurs se besluit om die mensdom 2 000 jaar voor die gebeure van die rolprent met vernietiging te straf. Scott het voorgestel ’n Ingenieur is na die Aarde gestuur om die mensdom se toenemende aggressie stop te sit, maar is gekruisig, wat impliseer dat dit Jesus Christus was.[16][18][19] Scott het egter gevoel dat ’n uitdruklike verband in die rolprent “’n bietjie te voor die hand liggend” sou wees.[16]

Kunsmatige intelligensie, ’n verenigende tema deur Scott se loopbaan as regisseur, is besonder duidelik in Prometheus, hoofsaaklik deur die robot David.[20] David is soos mense, maar wil nie soos hulle wees nie en vermy ’n algemene tema in “robotiese vertellings” soos in Blade Runner. David word na die beeld van die mensdom geskep, en terwyl die menslike bemanning van die tuig Prometheus na hulle skeppers soek in die verwagting dat hulle antwoorde sal kry, bestaan David tussen sy menslike skeppers maar is nie beïndruk nie; hy bevraagteken sy skeppers oor waarom hulle hulle eie skeppers soek.[17][21] Lindelof het die skip as ’n gevangenis vir David beskryf.[17] Aan die einde van die rolprent is David se skepper (Weyland) dood en sy fundamentele programmering sal eindig sonder iemand om te dien. Lindelof het verduidelik David se programmering word onduidelik en dat hy moontlik deur Shaw of deur sy eie nuuskierigheid geprogrammeer kan word. Ná Weyland se dood word David saam met Shaw agtergelaat, en hy is opreg geïnteresseerd daarin om haar te volg, deels uit oorlewing en deels uit nuuskierigheid.[22]

Die Dettifosswaterval in Ysland is in die prent se openingstoneel gebruik om te wys hoe 'n Ingenieur lewe skep.

Nog ’n tema is skepping en die vraag: “Wie is ek? Wie het my geskep? Waarom het U my verlaat?”.[18][23] Die ontwikkeling van die mitologie binne die fiktiewe heelal het die Joods-Christelike skepping van die mensdom ondersoek, maar Scott was geïnteresseerd in Grieks-Romeinse en Asteekse skeppingsmites oor gode wat mense na hulle eie beeld skep deur ’n deel van hulleself op te offer. Hierdie skepping word in die openingsgedeelte van die rolprent getoon waarin ’n Ingenieur homself opoffer nadat hy die donker vloeistof ingeneem het, en as ’n “tuinier in die ruimte” optree om lewe na ’n wêreld te bring.[19] Een van hulle ekspedisies skep die mensdom, wat weer kunsmatige lewe (David) na hulle eie beeld skep. David stel dan die donker vloeistof aan Holloway bekend, wat ’n onvrugbare Shaw bevrug. Die gevolglike kind bevrug daarna ’n Ingenieur, wat die kind van al drie geslagte skep.[18] Scott het die Ingenieurs vergelyk met die gevalle engele van John Milton se Paradise Lost[16] en gesê die mensdom was hulle nageslag en nie God s’n nie.[24]

Shaw is die enigste godsdienstige gelowige in die bemanning en vertoon openlik haar geloof met ’n hangertjie van ’n Christelike kruis. Lindelof het gesê haar oortuigings, gegewe haar wetenskaplike kennis, het teen 2093 verouderd gevoel. Shaw is opgewonde toe sy uitvind sy is deur die Ingenieurs geskep is en nie deur ’n bonatuurlike godheid nie, maar eerder as om haar geloof te verloor, word dit versterk. Lindelof het gesê die stel van vrae en die soeke na betekenis is die kern daarvan om te leef, en daarom word die gehoor gelaat om te wonder of Shaw deur God beskerm is vanweë haar geloof. Scott wou hê die rolprent moes eindig met Shaw se verklaring dat sy steeds na definitiewe antwoorde soek.[18] Benewens die godsdienstige temas het Lindelof gesê Prometheus is ten gunste van die wetenskap en stel ondersoek in na of wetenskaplike kennis en geloof in God saam kan bestaan.[25]

Die prent put verskeie invloede uit Paradise Lost, maar die tydskrif The Atlantic se Govindini Murty merk verdere invloede op en skryf “die treffende beelde wat Ridley Scott vir Prometheus uitgedink het, verwys na alles van Stanley Kubrick se 2001: A Space Odyssey tot Leonardo da Vinci se Vitruviaanse Man en Mario Bava se rolprent Planet of the Vampires. Scott brei ook die oorspronklike Alien-heelal uit deur ’n duidelik Engelse mitologie te skep wat beïnvloed is deur Milton se Paradise Lost en die simboliese tekeninge van William Blake.”[26]

Produksie en uitreiking

[wysig | wysig bron]
Ridley Scott is die regisseur van Prometheus.

Scott en die regisseur James Cameron het idees ontwikkel vir 'n voorprent vir Scott se gruprent Alien van 1979. In 2002 het die ontwikkeling van Alien vs. Predator (2004) voorrang geniet en die projek is laat vaar tot in 2009, toe Scott weer belangstelling daarin getoon het. Jon Spaihts het 'n draaiboek vir 'n voorprent geskryf. Fox het egter 'n oorspronklike rolprent bo 'n voorprent verkies en teen Julie 2010 is Damon Lindelof gehuur om Spaihts se draaiboek te herontwikkel.[27][28][29] In Oktober 2010 het Lindelof sy herskrewe draaiboek aan Fox voorgelê.

Die rolprent se naam sou eers Paradise gewees het na aanleiding van Milton se Paradse Lost, maar eindelik is op die naam Promotheus besluit. Daarna het die produksiespan begin om die fliek in die openbaar van sy Alien-oorsprong te distansieer en was hulle met opset vaag oor die verband tussen die prente, want hulle het geglo dit sou die gehoor se afwagting verhoog.[28] In Julie 2011 het Scott gesê: "Teen die einde van die derde bedryf begin jy besef daar is DNS van die heel eerste Alien, maar nie van een van die latere [prente] nie."[30]

Die voorproduksie het in April 2010 begin toe 'n span grafiese ontwerpe vir die prent ontwikkel het.[31] Scott het Fox oortuig om miljoene dollars te belê om wetenskaplikes en konsepkunstenaars te huur om 'n beeld van die laat 21ste eeu te skep.[32] Die produksie is hoogs geheim gehou.[33] Die hooffotografie het op 21 Maart 2011 begin, met 'n beraamde begroting van $120 miljoen tot $130 miljoen. Dit het 82 dae geduur.[32][34][35] Daarna is tonele in Engeland, Ysland,[36] Skotland, Jordanië en Spanje[37][38] geskiet. Werk aan die naproduksie het tot Maart 2012 geduur.

Prometheus se première was op 31 Mei 2012 in Londen.[39][40] Op 1 Junie is dit in die res van Brittanje uitgereik[41] en op 8 Junie in Noord-Amerika.[42] Die prent is terselfdertyd in IMAX-teaters en in 3D uitgereik.[43]

Ontwerp van die wesens

[wysig | wysig bron]

Neal Scanlan en Conor O'Sullivan het die prent se buiteaardse wesens ontwerp en probeer om duidelik te wys elke wese het 'n biologiese funksie en doel. Scanlan het gesê baie van Scott se inspirasie vir die ontwerpe kom uit die natuur, soos plante en seediere.[44] Huante se ontwerp van die bleek Ingenieurs is geskoei op verwysings wat Scott gebruik het. Hy en Scott het skilderye van William Blake en J.M.W. Turner, asook klassieke beeldhouwerke vir idees gebruik.[45]

Scott wou hê die Ingenieurs moes soos Grieks-Romeinse gode lyk en het die ontwerper Neville Page opdrag gegee om inspirasie te put uit die Vryheidstandbeeld, Michelangelo se David en Elvis Presley.[46] Van die ander wesens is op seediere geskoei.[47]

Ontvangs

[wysig | wysig bron]
Michael Fassbender is geprys oor sy uitbeelding van die robot David.

Die rolprent het oor die algemeen gunstige resensies gekry. Op Rotten Tomatoes was 73% van 312 resensies positief, met 'n gemiddelde telling van 7/10. Die webtuiste se konsensus lui: "Ridley Scott se ambisieuse kwasi-opvolg van Alien beantwoord dalk nie al die groot vrae nie, maar dit word deur visuele grootsheid en fassinerende toneelspel gered, veral dié van Michael Fassbender as 'n puntenerige robot". Op Metacritic het die prent 'n telling van 64 uit 100 van 43 resensente gekry, wat dui op 'n "algemeen gunstige" ontvangs.[48] Peilings deur CinemaScore het aangedui fliekgangers het die prent 'n gemiddelde telling B gegee op 'n skaal van A+ tot F. Die hoogste telling, 'n A-, het gekom van mense jonger as 25 jaar.[49][50]

Resensente het dikwels die prent se visuele sy, ontwerp en Fassbender se uitbeelding van die robot David geprys. Hulle was verdeeld oor die storielyn en het gemeen sekere elemente bly onopgelos of is voorspelbaar.[51]

In The Hollywood Reporter het Todd McCarthy die prent se beeldmateriaal tegnies lewendig, asemrowend en manjifiek genoem en die vertolkings van Fassbender, Rapace en Theron geprys. Hy het egter ook gemeen die prent “maak te veel voorsiening vir denkbeeldige gehoorverwagtings, terwyl ’n bietjie avontuurliker denke dit veel opwindender kon gemaak het.”[52]

Tom Huddleston van Time Out London het geskryf “die fotografie is aangenaam skerp en die ontwerp asemrowend,” maar “die draaiboek voel plat … die dialoog is lui, terwyl die intrige, hoewel propvol treffende konsepte, eenvoudig nie saamsmelt nie. Ná ’n genotvolle begin is die middelgedeelte slap, verwarrend en op plekke effens vervelig, terwyl die klimaks glans en vuurwerke het, maar geen werklike momentum nie.”[53]

Roger Ebert het die film vier uit vier sterre gegee en dit bestempel as ’n “naatlose vermenging van verhaal, spesiale effekte en volmaak gepaste rolverdeling, verfilm in verstandige, doeltreffende 3D wat nie aandag aftrek nie.” Hy het geskryf Rapace se vertolking “sit hier die tradisie van ontsagwekkende vroulike krag voort wat deur Sigourney Weaver in Alien begin is,” maar het gemeen dat Elba se Janek die interessantste karakterontwikkeling het. Ebert het gedink die intrige opper vrae sonder om dit te beantwoord, wat die film boeiend maak en parallel laat loop met die “klassieke tradisie van wetenskapsfiksie uit die goue era.”[54] Hy het dit later ook as een van die beste rolprente van 2012 aangewys.[55]

Scott, Theron en Fassbender doen reklamewerk vir die prent.

Total Film se Jonathan Crocker het geskryf die intrige word suksesvol verweef met Alien se mitologie terwyl dit sy eie oorspronklike idees bied.[56] Lisa Schwarzbaum van Entertainment Weekly was positief oor die rolverdeling, veral Rapace, en die kinematografie.[57]

Die webtuiste Salon se Andrew O'Hehir het geskryf die prent is “somber, skouspelagtig en swaarwigtig”, maar het die karakters gekritiseer omdat hulle nie gesonde verstand het nie. O'Hehir het ook melding gemaak van Wolski se kinematografie en Max se produksie-ontwerp.[58]

A.O. Scott van The New York Times het geskryf die verhaal is swak en aangevoer die vertelling se wendings ondermyn die “verhewe, verstandverblindende potensiaal” daarvan. Hy het gemeen die prent het geen openbarings nie, net “stukkies tydelik verrassende inligting sonder betekenis of weerklank,” en dat Rapace ’n “goeie heldin, kwesbaar en vasberade” is.[59]

The Guardian se Peter Bradshaw het geskryf Prometheus is “grootser en uitgebreider as Alien, maar het nie laasgenoemde se “sentrale verpletterende hou” nie.[60]

James Cameron, wat jare tevore saam met Ripley aan die prent begin werk het, het gesê: “Ek het Prometheus geniet. Ek het gedink dit is wonderlik. Ek het gedink dit is Ridley wat met oorgawe terugkeer na wetenskapsfiksie, met uitstekende taktiese vertolking, pragtige fotografie, uitstekende natuurlike 3D. Daar was dalk ’n paar dinge wat ek anders sou gedoen het, maar dit is nie die punt nie: Jy kan dit van enige prent sê.”[61] Tog het hy ook gesê die prent “maak nie logies sin nie.”[62]

Pryse en benoemings

[wysig | wysig bron]

Alien is vir talle rolprentpryse benoem, insluitend 'n Oscar vir beste spesiale effekte. Dit het drie daarvan gewen: 'n Key Art Award vir digitaal en innoverende media, asook 'n Sierraprys vir beste kunsredigering (Alex Cameron).

Verwysings

[wysig | wysig bron]
  1. ↑ "Prometheus". bbfc.co.uk. British Board of Film Classification. 10 Mei 2012. Geargiveer vanaf die oorspronklike op 14 Junie 2012. Besoek op 10 Mei 2012.
  2. ↑ Wigler, Josh (7 Maart 2011). "'Prometheus' Star Noomi Rapace Reveals 'Alien' Connection, Compares Her Character With Ripley". MTV. Geargiveer vanaf die oorspronklike op 8 Junie 2012. Besoek op 6 Februarie 2012.
  3. ↑ "Paradise Found: Ridley Scott's Alien Prequel Gets a Title, Takes Aim at Yeoh and Fassbender". New York. 8 Desember 2010. Geargiveer vanaf die oorspronklike op 23 April 2012.
  4. 1 2 3 ""Prometheus" Crew: On A Mission Collision". Inquirer.net. Philippine Daily Inquirer. 29 April 2012. Geargiveer vanaf die oorspronklike op 26 Junie 2012. Besoek op 30 April 2012.
  5. ↑ "Idris Elba Reveals Bits & Pieces Of "Prometheus"". Indie Wire. 9 Junie 2011. Geargiveer vanaf die oorspronklike op 31 Mei 2012. Besoek op 9 Junie 2011.
  6. ↑ Gammie, Joseph (6 Mei 2012). "Alien: The monster returns?". The Independent. Geargiveer vanaf die oorspronklike op 14 Junie 2012. Besoek op 6 Mei 2012.
  7. ↑ Fleming, Mike (14 Maart 2011). "Logan Marshall-Green Lands 'Prometheus'". Deadline Hollywood. PMC. Geargiveer vanaf die oorspronklike op 10 Junie 2012. Besoek op 11 Mei 2012.
  8. ↑ "Sean Harris". Troika. Geargiveer vanaf die oorspronklike op 28 Julie 2017. Besoek op 29 Oktober 2011.
  9. ↑ "Rafe Spall". Troika. Geargiveer vanaf die oorspronklike op 20 Maart 2017. Besoek op 29 Oktober 2011.
  10. ↑ "Emun Elliott". United Agents. Geargiveer vanaf die oorspronklike op 3 Mei 2012. Besoek op 4 Mei 2012.
  11. ↑ English, Paul (14 April 2012). "Rising Scots actor Emun Elliott reveals his excitement at starring in new Irvine Welsh film Filth". Daily Record. Geargiveer vanaf die oorspronklike op 9 Maart 2014. Besoek op 4 Mei 2012.
  12. ↑ Deggans, Eric (5 Augustus 2011). "Patrick Wilson lands on TV with new series "A Gifted Man" this fall". Tampa Bay. Geargiveer vanaf die oorspronklike op 15 Oktober 2012.
  13. ↑ "Language Log » Proto-Indo-European in Prometheus?". Besoek op 22 April 2020.
  14. ↑ Overbye, Dennis (2 Mei 2012). "He's Not Done With Exploring the Universe". The New York Times. Geargiveer vanaf die oorspronklike op 26 Mei 2024. Besoek op 9 Desember 2012.
  15. ↑ Nashawaty, Chris (11 Mei 2012d). "Damon Lindelof on whether 'Prometheus' is an 'Alien' prequel, plus life after 'Lost' (Page 4)". Entertainment Weekly. Geargiveer vanaf die oorspronklike op 11 Mei 2017. Besoek op 11 Mei 2012.
  16. 1 2 3 4 O'Connell, Sean (5 Junie 2012). "Dialogue: Sir Ridley Scott Explains 'Prometheus,' Explores Our Past, and Teases Future 'Alien' Stories". Fandango. Geargiveer vanaf die oorspronklike op 5 Junie 2023. Besoek op 2 Januarie 2024.
  17. 1 2 3 4 Gilchrist, Todd (17 Junie 2012). "'Prometheus' Writer Damon Lindelof on Why 'Vague' Is Good and the 'Sadistically Cool' Fallout From the 'Lost' Finale". Hollywood Reporter. Geargiveer vanaf die oorspronklike op 25 November 2012. Besoek op 9 Desember 2012.
  18. 1 2 3 4 Lyus, Jon (7 Junie 2012). "Prometheus Writer Damon Lindelof talks Engineers, Alien Family Tree & the Sequel's Opening Scene". Hey U Guys. Geargiveer vanaf die oorspronklike op 13 Januarie 2013. Besoek op 9 Desember 2012.
  19. 1 2 Jagernauth, Kevin (Junie 14, 2012). "Did Ridley Scott Just Ruin The Mystery Of 'Prometheus' & Kill Its Sequel? (Page 1)". Indie Wire. Geargiveer vanaf die oorspronklike op Mei 24, 2013. Besoek op Desember 9, 2012.
  20. ↑ Barkman, Adam; Barkman, Ashley; Kang, Nancy, reds. (2013). The Culture and Philosophy of Ridley Scott. Lexington Books. pp. 121–142. ISBN 978-0-7391-7872-0.
  21. ↑ McCabe, Farley & Edwards 2012, p. 60.
  22. ↑ Yamato, Jen (12 Junie 2012). "Damon Lindelof on Prometheus's Ending and a Handy, Spoilery Alien Infographic". Geargiveer vanaf die oorspronklike op 20 Januarie 2013. Besoek op 9 Desember 2012.
  23. ↑ Wise, Damon (26 Mei 2012). "Prometheus: the making of a new myth". The Guardian. Geargiveer vanaf die oorspronklike op 31 Mei 2012. Besoek op 9 Desember 2012.
  24. ↑ Jagernauth, Kevin (Junie 14, 2012). "Did Ridley Scott Just Ruin The Mystery Of 'Prometheus' & Kill Its Sequel? (Page 2)". Indie Wire. Geargiveer vanaf die oorspronklike op Augustus 14, 2012. Besoek op Desember 9, 2012.
  25. ↑ Woerner, Meredith (7 Junie 2011). "Is Prometheus anti-science? Screenwriter Damon Lindelof responds". io9. Gawker Media. Geargiveer vanaf die oorspronklike op 18 September 2012. Besoek op 9 Desember 2012.
  26. ↑ Murty, Govindini (11 Junie 2012). "Decoding the Cultural Influences in 'Prometheus,' From Lovecraft to 'Halo'". The Atlantic. The Atlantic. Geargiveer vanaf die oorspronklike op 3 Februarie 2013. Besoek op 11 Junie 2012.
  27. ↑ Mottram, James (3 September 2010). "Ridley Scott: 'I'm doing pretty good, if you think about it'". The Independent. London. Geargiveer vanaf die oorspronklike op 11 November 2012.
  28. 1 2 Nashawaty, Chris (11 Mei 2012c). "Damon Lindelof on whether 'Prometheus' is an 'Alien' prequel, plus life after 'Lost' (Page 3)". Entertainment Weekly. Geargiveer vanaf die oorspronklike op 11 Mei 2017. Besoek op 11 Mei 2012.
  29. ↑ Goldberg, Matt (8 Oktober 2012). "Ridley Scott Refused to Do an Extended Cut for Prometheus Blu-ray; Jon Spaihts Reveals Details about His Original Script". Collider.com. Geargiveer vanaf die oorspronklike op 9 Oktober 2012. Besoek op 8 Oktober 2012.
  30. ↑ "Interview: Ridley Scott Talks Prometheus, Giger, Beginning of Man and Original Alien". Filmophilia. 17 Desember 2011. Geargiveer vanaf die oorspronklike op 17 Junie 2012. Besoek op 19 Desember 2011.
  31. ↑ Carroll, Larry (22 April 2010). "Exclusive: Ridley Scott Reveals 'Alien' Prequel Details". MTV. Viacom. Geargiveer vanaf die oorspronklike op 22 Junie 2012. Besoek op 5 Maart 2012.
  32. 1 2 Galloway, Stephen (16 Mei 2012). "Return of the 'Alien' Mind". The Hollywood Reporter. Geargiveer vanaf die oorspronklike op 5 Junie 2023. Besoek op 28 April 2013.
  33. ↑ Lussier, Germain (22 Julie 2011). "Damon Lindelof Discusses The Secrecy Of 'Prometheus'". SlasherFilm.com. Geargiveer vanaf die oorspronklike op 23 Julie 2012. Besoek op 18 Desember 2011.
  34. ↑ Ho, Lawrence K (8 April 2011). "'Prometheus': Michael Fassbender on Ridley Scott's 'breathtaking' project". Los Angeles Times. Geargiveer vanaf die oorspronklike op 14 Junie 2012.
  35. ↑ B, Benjamin (Julie 2012). "Ancient Aliens". American Cinematographer. American Society of Cinematographers. Geargiveer vanaf die oorspronklike op 4 Februarie 2013. Besoek op 25 Julie 2012.
  36. ↑ Nashawaty 2011, p. 43.
  37. ↑ Illescas, Sergio. "Ridley Scott rodará en Alicante 'Prometheus', el origen de 'Alien'" (in Spaans). informacion. Geargiveer vanaf die oorspronklike op 18 Junie 2012.
  38. ↑ Ruiz Coll, M. A. (31 Augustus 2011). "Ridley Scott rueda en Alicante "Prometheus"" (in Spaans). ABC. Geargiveer vanaf die oorspronklike op 28 Desember 2013. Besoek op 9 Mei 2013.
  39. ↑ Szalai, George (31 Mei 2012). "Charlize Theron, Michael Fassbender Attend London Premiere of Ridley Scott's 'Prometheus'". The Hollywood Reporter. Geargiveer vanaf die oorspronklike op 19 Junie 2012. Besoek op 31 Mei 2012.
  40. ↑ Flynn, Richard (24 Mei 2012). "London's Leicester Square re-opens after 18 month renovation". Screen International. Geargiveer vanaf die oorspronklike op 27 Junie 2012. Besoek op 24 Mei 2012.
  41. ↑ Langshaw, Mark (9 Mei 2012). "'Prometheus' gets 15 certificate in UK, passed uncut". Digital Spy. Hearst Corporation. Geargiveer vanaf die oorspronklike op 11 Junie 2012. Besoek op 9 Mei 2012.
  42. ↑ McClintock, Pamela (26 Januarie 2011). "Ridley Scott's 'Prometheus' Gets High-Profile Summer Release Date". The Hollywood Reporter. PMC. Geargiveer vanaf die oorspronklike op 2 November 2012.
  43. ↑ "'Prometheus' To Get IMAX 3D Release". Deadline Hollywood. PMC. 8 Maart 2012. Geargiveer vanaf die oorspronklike op 23 Junie 2012. Besoek op 8 Maart 2012.
  44. ↑ Cauthen, Shawn (24 April 2012). "Prometheus: Building the Greatest Alien Playground with Real Sets, Props and Stunts". Screenslam.com. Geargiveer vanaf die oorspronklike op 26 Junie 2012. Besoek op 9 Mei 2012.
  45. ↑ Anders, Charlie Jane (12 Junie 2012). "10 Things You Didn't Know About the Making of Prometheus". io9. Geargiveer vanaf die oorspronklike op 16 Junie 2012. Besoek op 13 Junie 2012.
  46. ↑ Mohamed, Nurie (3 Augustus 2012). "Designing the Perfect Engineer for Prometheus". Wired. Besoek op 4 Augustus 2012.
  47. ↑ Hart, Hugh (15 Junie 2012). "Origin of the Creepy Species, Prometheus-Style". Wired. Geargiveer vanaf die oorspronklike op 18 Junie 2012. Besoek op 16 Junie 2012.
  48. ↑ "Prometheus". Metacritic. Geargiveer vanaf die oorspronklike op 19 April 2022. Besoek op 1 Mei 2022.
  49. ↑ Finke, Nikki (10 Junie 2012). "HOT WEEKEND! Both 'Madagascar 3' And 'Prometheus' On Fire For $59.6M/$49.5M". Deadline Hollywood. PMC. Geargiveer vanaf die oorspronklike op 13 Junie 2012. Besoek op 9 Junie 2012.
  50. ↑ Stewart, Andrew (10 Junie 2012). "'Madagascar,' 'Prometheus' triumph at B.O." Variety. Geargiveer vanaf die oorspronklike op 20 April 2021. Besoek op 30 April 2022.
  51. ↑ Gettell, Oliver (8 Junie 2012). "'Prometheus' comes up short of 'Alien' aspirations, critics say". Los Angeles Times. Geargiveer vanaf die oorspronklike op 29 Januarie 2013. Besoek op 24 Mei 2013.
  52. ↑ McCarthy, Todd (30 Mei 2012). "Prometheus: Film Review". The Hollywood Reporter. Geargiveer vanaf die oorspronklike op 13 Junie 2012. Besoek op 31 Mei 2012.
  53. ↑ Huddleston, Tom (31 Mei 2012). "Prometheus: Film Review". Time Out London. Geargiveer vanaf die oorspronklike op 14 Junie 2012. Besoek op 5 Junie 2012.
  54. ↑ Ebert, Roger (6 Junie 2012). "PROMETHEUS (R)". Chicago Sun-Times. Geargiveer vanaf die oorspronklike op 16 Junie 2012. Besoek op 6 Junie 2012.
  55. ↑ Ebert, Roger (27 Desember 2012). "EBERT'S TOP MOVIES OF 2012". rogerebert.com. Geargiveer vanaf die oorspronklike op 8 April 2016. Besoek op 3 November 2013.
  56. ↑ Crocker, Jonathan (30 Mei 2012). "Prometheus". Total Film. Geargiveer vanaf die oorspronklike op 14 Junie 2012. Besoek op 5 Junie 2012.
  57. ↑ Schwarzbaum, Lisa (6 Junie 2012). "Prometheus (2012)". Entertainment Weekly. Geargiveer vanaf die oorspronklike op 11 Mei 2017. Besoek op 6 Junie 2012.
  58. ↑ O'Hehir, Andrew (6 Junie 2012). ""Prometheus": Ridley Scott's dazzling, sci-fi spectacle". Salon. Geargiveer vanaf die oorspronklike op 18 Junie 2012. Besoek op 6 Junie 2012.
  59. ↑ Scott, A.O. (7 Junie 2012). "Something Wicked Their Way Comes, via the Galactic Void". The New York Times. Geargiveer vanaf die oorspronklike op 17 Junie 2012. Besoek op 7 Junie 2012.
  60. ↑ Bradshaw, Peter (30 Mei 2012). "Prometheus – review". The Guardian. Geargiveer vanaf die oorspronklike op 17 Junie 2012. Besoek op 31 Mei 2012.
  61. ↑ Heynman, Jessie (7 September 2012). "James Cameron On Kate Winslet's 'Titanic' Comments: 'Get Over It'". news.moviefone.com. Geargiveer vanaf die oorspronklike op 8 September 2012. Besoek op 7 Oktober 2012.
  62. ↑ Davis, Edward (14 April 2014). "James Cameron Wanted To Make 'Aliens 5' With Ridley Scott, Says 'Prometheus' "Didn't Add Up Logically"". IndieWire. Geargiveer vanaf die oorspronklike op 18 September 2025. Besoek op 23 Oktober 2021.

Skakels

[wysig | wysig bron]
Ontsluit van "https://af.wikipedia.org/w/index.php?title=Prometheus_(2012-rolprent)&oldid=2903893"