Rasionele ontwerp (Boukunde)
Rasionele ontwerp in boukunde vind plaas wanneer die empiriese reëls soos vervat in Nasionale Bouregulasies ontoereikend of ontoepaslik is.[1][2] Rasionele ontwerp moet deur ‘n bevoegde persoon uitgevoer word. Dit behels gewoonlik prestasiebaseerde ontwerp van struktuur, dienste, brandveiligheid, termiese gedrag, ventilasie en akoestiek. Al die aspekte word gedek deur aparte SANS-standaarde. In die geval van byvoorbeeld termiese gedrag word weerdata, interne warmtelas soos ligte en mense, oriëntasie en soninvalshoeke, vensters en die isolasiewaarde en warmtekapasiteit van die mure, dak en vloere van die gebou in ag geneem. Rekenaarprogramme word hiervoor gebruik met die digitale tekeninge as model.