Robbie Keane

Robbie Keane

Keane in 2013
Persoonlike inligting
Geboortedatum	8 Julie 1980 (1980-07-08)
Geboorteplek	Tallaght, Dublin, Republiek Ierland
Lengte	1,76 m
Speelposisie	Aanvaller, doelskieter
Klubinligting
Huidige klub	Ferencváros (hoofafrigter)
Jeugloopbaan
1986–1990	Fettercairn YFC
1990–1996	Crumlin United
1996–1997	Wolverhampton Wanderers
Seniorloopbaan*
Jare	Span	Kere†	(Doele)†
1997–1999	Wolverhampton Wanderers	73	(24)
1999–2000	Coventry City	31	(12)
2000–2001	Inter Milaan	6	(0)
2001	→ Leeds United (leen)	18	(9)
2001–2002	Leeds United	28	(4)
2002–2008	Tottenham Hotspur	197	(80)
2008–2009	Liverpool	19	(5)
2009–2011	Tottenham Hotspur	41	(11)
2010	→ Celtic (leen)	16	(12)
2011	→ West Ham United (leen)	9	(2)
2011–2016	LA Galaxy	125	(83)
2012	→ Aston Villa (leen)	6	(3)
2017–2018	ATK	9	(6)
Totaal		578	(251)
Nasionale span
1996	Ierland o/16	3	(1)
1998	Ierland o/18	4	(3)
1999	Ierland o/20	4	(0)
1998–2016	Ierland	146	(68)
Spanne bestuur
2018	ATK
2023–2024	Maccabi Tel Aviv
2025–	Ferencváros
* Kere vir seniorklub uitgedraf en doele is net vir die plaaslike liga.. † Kere uitgedraf (Doele).

Robert David Keane (gebore 8 Julie 1980) is ’n Ierse professionele sokkerafrigter en voormalige speler. Keane het as ’n doelskieter (aanvaller) gespeel, en was kaptein van die die Ierse nasionale span van Maart 2006 tot sy internasionale uittrede in Augustus 2016. Hy het die meeste wedstryde vir die nasionale span gespeel en die meeste doele vir hulle aangeteken.

Keane het sy loopbaan by Wolverhampton Wanderers begin, waar hy twee doele op sy eerstespan-debuut aangeteken het op 17-jarige ouderdom. Die volgende seisoen was hy die klub se voorste doelskieter en het hy sy eerste internasionale doel vir Ierland aangeteken. Hy het gereeld van klub verander tussen 1999 en 2002, en oordragskofrekords laat tuimel, maar sy kort verblyf by Inter Milaan en Leeds United was onopvallend. Hy het in 2002 by Tottenham Hotspur aangesluit en daar sewe en ’n half jaar oor twee periodes gespeel, met ’n totaal van 306 wedstryde en 122 doele in alle kompetisies. Die 2007/08-seisoen was die vrugbaarste van sy loopbaan toe hy ’n persoonlike rekord van 23 doele in ’n seisoen opgestel het, insluitend sy mylpaal van 100 kompetisie-doele, en sy eerste senior trofee gewen het (die Liga-beker).

Keane het in Julie 2008 na Liverpool verhuis, maar hy het net ses maande by die klub deurgebring voordat hy na Tottenham teruggekeer het, waar hy as eerstespan-kaptein aangewys is. In Januarie 2010 het hy op ’n lening na die Skotse Premierliga-klub Celtic gegaan vir die res van die seisoen, en in die tweede helfte van die daaropvolgende seisoen is hy aan West Ham United uitgeleen. Hy het Tottenham in 2011 verlaat vir LA Galaxy, en in Januarie 2012 het hy op ’n twee-maande lening na Aston Villa gegaan gedurende die Major League Soccer (MLS)-buiteseisoen. Hy het LA Galaxy in 2016 verlaat nadat hy 104 doele oor ses seisoene aangeteken het, en daarna ’n kort tydperk by die Indiese klub Atlético de Kolkata deurgebring. Keane het sy uittrede uit professionele sokker in November 2018 aangekondig. In totaal het hy 126 Premierliga-doele vir ses klubs aangeteken, wat hom die 17de suksesvolste doelskieter in die geskiedenis van die Premierliga maak.

Algemeen beskou as een van die beste Ierse spelers van alle tye, het Keane 68 doele vir die nasionale span van die Republiek Ierland aangeteken oor ’n 18-jaar internasionale loopbaan, wat hom die land se allertydse rekorddoelskieter maak. Sy 146 wedstryde is ook ’n Ierse rekord. Keane is die gesamentlik sewende hoogste Europese internasionale doelskieter van alle tye, en die enigste speler in die wêreldgeskiedenis wat ten minste een internasionale doel in 19 opeenvolgende jare aangeteken het. Keane was Ierland se topskieter by die Wêreldbekertoernooi in 2002 met drie doele toe hulle die laaste 16 bereik het, en het ook aan UEFA Euro 2012 en UEFA Euro 2016 deelgeneem.

Nadat hy sy uittrede aangekondig het, het Keane sy afrigtingsloopbaan begin by die Ierse nasionale span as assistentafrigter onder Mick McCarthy in November 2018. Hy het ook in 2019 die rol van assistentafrigter by die Championship-klub Middlesbrough aangeneem, saam met sy voormalige spanmaat Jonathan Woodgate as bestuurder. Hy het albei rolle in 2020 verlaat. Hy het in Junie 2023 hoofafrigter van Maccabi Tel Aviv geword en die Israelse Premierliga en Toto-beker in sy enigste seisoen gewen. Hy het in Januarie 2025 bestuurder van Ferencváros geword en het die Hongaarse titel aan die einde van die seisoen gewen.