Amasonebende

in Wikipedia, die vrye ensiklopedie
(Aangestuur vanaf Roman Podkopajef)
Inessa Tarwerdijewa
Roman Podkopajef
Land  Rusland
Bynaam  Amasonebende
Misdaad  Moord, roof
Misdaadbesonderhede
Plek Federale Distrik
Noord-Kaukasus
Datum(s)  2003-2013
Slagoffers  10-30 moorde
Vonnisbesonderhede
Aangekeer  8 September 2013
Vonnisdatum  5 Desember 2017

Die Amasonebende (Rusland: Банда «амазонок», Banda "amazonok") is ’n gesin reeksmoordenaars van Stawropol, Rusland, wat oor ’n tydperk van ses jaar vir ’n reeks moorde en rooftogte verantwoordelik was. Inessa Tarwerdijewa, haar man, Roman Podkopajef (35), en twee dogters, Wiktoria (25) en Anastasia (13), het die moorde van 2007 af gepleeg, maar dit kon in 1998 al begin het. Dit het geduur totdat hulle in 2013 aangekeer is.[1][2]

Oorsprong van die naam[wysig | wysig bron]

Die gesin se bynaam kom van joernaliste wat die moorde gedek het. Die plaaslike media het ’n mes naby een van die misdaadtonele ontdek met daarop gegraveer: "My Gunsteling-Amasone". Hulle het aangeneem dit is Inessa se mes,[3] maar volgens die onderhoof van die ondersoekdepartement vir Rostof-oblast, Igor Berezin, het die mes aan ’n meisie behoort met geen bande met die bende of hulle misdade nie.[4]

Lede[wysig | wysig bron]

Die gesin het in ’n gerieflike huis op die dorp Diwnoje naby Stawropol, die administratiewe hoofstad van Stawropol-krai, gewoon.[3] Hulle het kampeeruitstappies na die Rostof-oblast gebruik as dekmantel vir hulle misdade.

  • Roman Podkopajef (Роман Подкопаев, 35), die patrairg van die gesin, was ’n geregistreerde tandarts. Hy was ’n verdagte in die dood van Inessa se eerste man en het later met Inessa getrou.
  • Inessa Tarwerdijewa (Инесса Тарвердиева, 46), die matriarg van die gesin, was ’n kindertuinonderwyseres en tuisteskepper, maar het ophou skoolhou om te roof en moor. Sy het polisiemanne gehaat nadat haar minnaar, ’n polisieman, haar vir ’n ander vrou verlaat het.
  • Wiktoria Tarwerdijewa (Виктория Тарвердиева, 25), die oudste dogter uit Inessa se vorige huwelik met ’n Azerbeidjanner, Arzoe Tarwerdijef, wat onder geheimsinnige omstandighede dood is.
  • Anastasiya Tarwerdijewa (Анастасия Тарвердиева, 13), die jongste lid van die gesin en ’n minderjarige tydens die moorde.[1]
  • Sergei Sinelnik (Сергей Синельник, 35), die man van Anastasia Sinelnik en swaer van Podkopajef. Hy was ’n polisieman wat inligting aan die gesin verskaf het om hulle in hulle misdade te help.
  • Anastasia Sinelnik (Анастасия Синельник, 26), die suster van Podkopajef, wat betrokkenheid by die misdade ontken het; sy het egter van die gesteelde goedere geberg.

Moordorgie[wysig | wysig bron]

Michail Zlidnef

Op 17 Februarie 2008 het die bende Michail Zlidnef, hoof van die inligtingsafdeling van die staat se dwelmbeheerdiens, en sy vrou in Aksai vermoor. Hulle is in hulle huis geskiet en toe met messe doodgesteek. Die moordenaars het twee baadjies en ’n TV-afstandbeheerder uit die huis gevat.[5]

Aleksei Sazonof en Joelia Wasiljewa

Op 17 Julie 2008 het die bende op die motor waarin Aleksei Sazonof en Joelia Wasiljewa gereis het, op die snelweg in die Aksai-distrik geskiet. Sazonof is dood en Wasiljewa ernstig geword. ’n Beursie met ’n rybewys en paspoort is gesteel.[5]

Tsjoedakof-gesin

Op 8 Julie 2009 het die gesin luitenantkolonel Dmitri Tsjoedakof van Nizjni Nowgorod, sy vrou en sewejarige seuntjie oorrompel en met ’n halfoutomatiese geweer geskiet terwyl hulle aan die kant van die pad geparkeer was. Hulle 11-jarige dogter, Weronika, is 37 keer gesteek. Hulle het ’n skootrekenaar, haardroër en kamera van altesaam £950 gevat en goue juweliersware agtergelaat.[1] Dit was die gesin se bekendste misdaad. Aleksei Serenko van die nabygeleë stad Aksai is verkeerdelik skuldig bevind en het twee jaar tronkstraf uitgedien vir die misdaad. Die enigste getuienis teen hom was die uitslag van ’n ballistiese ondersoek wat bevind het die Tsjoedakof-gesin is met Serenko se vuurwapen geskiet. Later is die getuienis verkeerd bewys en Serenko is vrygelaat.[5]

Tienermeisies

In 2010 het die gesin weer geroof en gemoor. Die slagoffers was dié keer twee tienermeisies, van wie een glo Tarwerdijewa se pleegkind was. Die bende het die gesin ingewag omdat hulle geweet het daar is wapens en geld, maar toe net die gesin se twee dogters opdaag, is hulle in ’n lokval gelei. Die meisies is gemartel en hulle oë uitgesteek voordat hulle vermoor is.[6] Hoewel Inessa skuld aan moorde op volwassenes beken het, het sy beweer sy het nooit kinders vermoor nie en gesê: "My man het hulle geskiet."[1]

Nowotsjerkassk-moorde

Op 10 Maart 2009 het die gesin in ’n huis aan die buitewyke van Nowotsjerkassk by ’n huis ingebreek en die twee inwoners vermoor; hulle is eers met ’n geweer geskiet en toe met ’n mes gesteek. Paspoorte, ’n skootrekenaar, ’n kamera, vrouestewels en twee baadjies is gevat.

Op 19 September 2012 het die gesin in Nowotsjerkassk die 26-jarige Wladimir Mandrik en 22-jarige Wasili Kamforin, twee werknemers van ’n privaat sekuriteitsmaatskappy, vermoor nadat hulle ondersoek ingestel het na ’n alarm wat by ’n plaaslike kliniek afgegaan het. Die gesin het die twee mans se dienswapens afgeneem, wat ’n Kalasjnikof-aanvalsgeweer en twee pistole ingesluit het.

Op 29 November 2012, steeds in Nowotsjerkassk, het die gesin by die huis van die taxidrywer Wadim Lozjkof ingebreek. Die man het hulle agtervolg, maar is met die wapens geskiet wat van die twee sekuriteitsmanne afgeneem is.

Op 16 Maart 2013 het die gesin die motorinspekteur Nikolai Koetsekon van Aksai vermoor wat uit sy woonstel gekom het omdat sy motoralarm afgegaan het. Toe hy verdagte mense naby sy motor sien, wou hy hulle gevange hou, maar is doodgeskiet.

Op 8 April 2013, in die buitewyke van Nowotsjerkassk, het die gesin op ’n motor met werknemers van ’n kruidenierswarewinkel geskiet wat ondersoek kom instel het na ’n alarm wat by die winkel afgegaan het. Die gewonde bestuurder, Nikolai Korsoenof, het oorleef, maar sy kollega, Joeri Statsenko, is later in die hospitaal dood.[5]

Andrei Joerin

Op 24 April 2013 het die gesin die 39-jarige polisieluitenant Andrei Joerin in die Aksai-distrik vermoor nadat hy die aand sy huis verlaat het. Joerin is van naby geskiet. Die gesin het by die huis probeer inbreek, maar die deur was gesluit en hulle is weg sonder om iets te vat. So het Joerin se vrou en kind se lewe gespaar gebly.[7]

Arres en vonnis[wysig | wysig bron]

Op 8 September 2013, nadat Podkopajef en Wiktoria ’n onbekende paartjie geskiet het, het hulle die huis van ’n voormalige militêre offisier in Aksai beroof. Toe hulle geen geld kry nie, het hulle kerse, alkohol en hoenderboudjies uit die yskas gesteel. Hulle het met skopfietse weggejaag, maar is kort daarna deur die polisiemanne Iwan Sjachowoi en Aleksei Lagoda voorgekeer. Podkopajef het Sjachowoi doodgeskiet en Lagoda gewond, en is self kort daarna doodgeskiet nadat Lagoda polisiehulp ontbied het. Wiktoria is ernstig gewond in die skietery. Kort daarna is Inessa en Anastasia op ’n kampeerterrein aangekeer waar hulle ’n groot kis wapens bewaak het, insluitende 20 gewere, ’n knaldemper, handgranate en ammunisie. Artikels wat van hulle slagoffers gesteel is, is ook in die kamp gekry, en dit het die gesin aan tientalle moorde verbind.[1]

Podkopajef se suster, Anastasia Sinelnik, en haar man, Sergei, is ook in hegtenis geneem op vermoede dat die paartjie die gesin in hulle misdade bygestaan het deur inligting oor polisie-operasies en -bewegings aan hulle te verskaf.[1]

Die vier oorlewende meerderjarige aangehoudenes is aangekla van roof en moord. Die gesin het hulle misdade blykbaar beskou soos ’n dag op kantoor. Tarwerdijewa, wat erken het sy haat polisiemanne en haarself blykbaar as ’n soort heldin beskou het, het verklaar: “Ek is van nature ’n rampokker.”[1] Sy het ook gesê sy is jammer sy het so min polisiemanne vermoor. Anastasia het in die hof ontken dat sy die gesin gehelp het. Sergei het beken dat hy daarvan gehou het om te weet wie die misdade pleeg, maar sy kollegas nie. Die paartjie het gesteelde goedere in hulle huis gehou en soms juweliersware na juweliers geneem om te verkoop.

Die jurie het die beskuldigdes skuldig bevind aan altesaam 95 aanklagte, onder meer 10 bewese moorde, twee pogings tot moord, roof en onwettige wapensmokkelary.[8] Op 5 Desember 2017 is Inessa Tarwerdijewa gevonnis tot 21 jaar tronkstraf en Wictoria tot 16.

Die ondersoek na die Amasonebende duur voort. Die moontlikheid word nie uitgesluit dat hulle nog tientalle misdade, meestal moorde, gepleeg het en dat hulle eindelik vir minstens 30 moorde verantwoordelik was nie.[1] Daar kan moontlik nog ’n verhoor wees vir misdade waaraan hulle nie in 2017 skuldig bevind is nie.[9]

Verwysings[wysig | wysig bron]

  1. 1,0 1,1 1,2 1,3 1,4 1,5 1,6 1,7 "'Ordinary Housewife' Mum, Husband And Daughters Carried Out Killing Spree Of 30 Murders In Russia". HuffPost UK (in Engels). 14 Augustus 2014. Besoek op 12 September 2017.
  2. Atkins, Nigel (17 September 2013). "Middle-class mum, dad and two daughters kill THIRTY victims in six-year reign of terror". mirror. Besoek op 12 September 2017.
  3. 3,0 3,1 "Семейная банда призналась в 30 убийствах и полсотне грабежей". Российская газета (in Russies). 23 Januarie 2014. Besoek op 12 September 2017.
  4. правды», Ирина ПОТЕРЯ | Сайт «Комсомольской (27 September 2013). "Нож с надписью "Моей любимой амазонке" никогда не принадлежал ростовской банде убийц". KP.RU - сайт «Комсомольской правды» (in Russies). Besoek op 12 September 2017.
  5. 5,0 5,1 5,2 5,3 "Google Translate". translate.googleusercontent.com. Besoek op 12 September 2017.
  6. "From Nursery School Teacher and Dentist to Murderers - Scared Yet?". Scared Yet? (in Engels). 18 Junie 2015. Geargiveer vanaf die oorspronklike op 13 September 2017. Besoek op 12 September 2017.
  7. "Убийцы где-то рядом". Новая газета - Novayagazeta.ru (in Russies). Besoek op 12 September 2017.
  8. Николай Грищенко (5 Desember 2017). "76 лет на четверых: В Ростове вынесен приговор "банде амазонок"". Российская газета, федеральный выпуск, № 276 (7442). Besoek op 11 Mei 2019.
  9. Владимир Шарапов (7 Desember 2017). "«Сколько убила, я не считала»: «Ростовские амазонки» жили разбоем и убивали полицейских". Лента.ру. Besoek op 11 Mei 2019.

Skakels[wysig | wysig bron]