Rondalia
Rondalia was in die tweede helfte van die 20ste eeu 'n groot Suid-Afrikaanse verskaffer van vakansiehuisvesting en bystand aan die reisende publiek.
Dienste[wysig | wysig bron]
Rondalia het 'n uiteenlopende reeks dienste aan sy lede verskaf. Die organisasie het verskeie vakansieoorde besit. Vanuit sy hoofkantoor te Visagiestraat in Pretoria en takkantore landwyd is die tyskrif Die Mylpaal uitgegee, 'n toerklub (Rontoer) bestuur, noodpadbystand verleen, reisadvies verskaf en 'n reisburo bedryf. Verder is motor- en lewensversekering vir die lede gereël. Die organisasie het ook motortoetssentrums, hersteldiens- en duikklopwerkswinkels bedryf.
Die stigter Christo A. Bisschoff en sy broer het beding vir die regte van motoriste.
Vakansieoorde[wysig | wysig bron]
Rondalia se vakansieparke het almal mettertyd oorgegaan in die hande van ander organisasies. Die ATKV bestuur nou Goudini Spa by Worcester, Drakensville, Klein-Kariba, Buffelspoort en Die Eiland by Letsitele. Forever Resorts beheer tans die vakansieoorde by Tshipise, Swadini, Loskop en Gariepdam. In KwaZulu-Natal is die oord by Hibberdene nou bekend as Anchors Aweigh. Dan was daar ook nog Rondalia Oog ('n gewilde warmbron by Naboomspruit) en die Hans Merensky-natuurreservaat (Die Eiland).
Geskiedenis[wysig | wysig bron]
Rondalia het op 30 Augustus 1955 begin met die stigting van 'n vakansieoord by Hibberdene. Op 1 April 1957 het die Rondalia Toerklub hieruit ontwikkel. Die doel was om die Afrikaner 'n vastrapplek in die ontluikende toerismebedryf te gee. Dit moes dien as 'n mededinger vir die meer Engelsgesinde Automobile Association (die AA). In 1966 is die RAC in Suid-Afrika deur die AA oorgeneem en in die 1980's het die AA ook dele van sy mededinger Rondalia geabsorbeer.
Naam[wysig | wysig bron]
Die naam "Rondalia" is afgelei van die aanvanklike vakansiehuisvesting, die rondawel.
Bibliografie[wysig | wysig bron]
- Afrikaanse Kultuuralmanak. Aucklandpark: Federasie van Afrikaanse Kultuurvereniginge, 1980. ISBN 0-620-04543-4
- Standard Encyclopaedia of Southern Africa, deel 7. Kaapstad: Nasou, 1972. ISBN 0-625-00323-3
- www.4X4community.co.za