Ruang Talok 69
| Ruang Talok 69 (6ixtynin9) | |
|---|---|
| Regisseur | Pen-Ek Ratanaruang |
| Vervaardiger | Pen-Ek Ratanaruang |
| Draaiboek | Pen-Ek Ratanaruang |
| Met | Lalita Panyopas |
| Kinematografie | Chankit Chamnivikaipong |
| Verspreider | Five Star Production |
| Uitgereik | 1999 |
| Speeltyd | 118 minute |
| Land | Thailand |
| Taal | Thais |
Ruang Talok 69 (Thais: เรื่องตลก 69, Engels: 6ixtynin9 of A Funny Story About 6 and 9) is 'n Thaise swart komedie en misdaaddrama wat deur Pen-Ek Ratanaruang geskryf en geregisseer is. Die hoofrol word vertolk deur Lalita Panyopas, 'n gewilde ster van Thaise sepies.
'n Nuwe weergawe vir televisie, 6ixtynin9: The Series, het in 2023 sy première op Netflix gehad, net Davika Hoorne as Toem.
Bederwingswaarskuwing: Die storielyn en/of storie se einde volg hieronder.
Storielyn
[wysig | wysig bron]Toem is 'n sekretaresse by 'n bank wat noodgedwonge sy personeel moet verklein. Omdat die baas dit nie oor sy hart kan kry om te kies wie afgedank moet word nie, gebruik hy fortuinstokkies om te kies wie moet gaan. Toem trek een van die ongelukkige nommers. Terug by haar woonstel vind sy uit die hyser is buite werking en is ietwat geïrriteerd deur 'n jong man wat effens te gretig is om te help. Tog is sy vriendelik met hom. Toe sy alleen is, oorweeg sy allerhande maniere om selfmoord te pleeg.
Die volgende oggend ontdek sy 'n noedelboks voor haar deur met note van 'n miljoen baht. Dit is blykbaar voor haar woonstel gelos omdat die nommer teen haar deur, 6, 'n spyker kort; daarom swaai dit telkens onderstebo sodat dit lyk of sy in woonstel 9 woon, wat eintlik verder in die gang af is. Kort daarna kom vra twee boewe van 'n vegkunskamp haar of sy die boks gesien het. Hulle forseer hulle pad na binne en word per ongeluk doodgeskiet.
Toem besluit om van die lyke ontslae te raak, 'n vliegkaartjie te koop, 'n vals paspoort en visum te kry, die geld saam met haar te neem en die res van haar lewe iewers anders te gaan woon. Maar die boef Kanjit, wat vals paspoorte maak, is die een man van wie sy moet wegbly. Die promotor van die vegkunskamp stuur nog mans na haar woonstel, waar een vinnig in haar kas wegkruip toe sy onverwags tuis kom. 'n Jong polisieman, die minnaar van haar neusinstekerige buurvrou, Pen, klop aan haar deur om haar iets te vra en ontdek die lyke. Die man in die kas trek die polisieman se aandag toe hy sy wapen oorhaal, en albei sterf in die daaropvolgende skietgeveg. Nog 'n man kom later by Toem se woonstel aan op soek na die vermiste mans.
Daar is ook Toem se vriendin, Jim, wat radeloos is omdat haar kêrel haar verkul. Toem neem Jim saam toe sy haar paspoort gaan haal, en Jim word per ongeluk doodgeskiet in die skietery wat volg. Toem vat die geld en maak dat sy wegkom. Toem onthou haar buurvrou Pen het vir haar vertel van twee lyke wat in die plaaslike meer gegooi is en hoe alles in die meer verdwyn. Sy gaan gooi die geld daarin en het op die ou einde net skuldgevoelens oor.
Nuwe weergawe
[wysig | wysig bron]'n Nuwe weergawe vir televisie, 6ixtynin9: The Series, het in 2023 sy première op Netflix gehad, met Davika Hoorne as Toem. Die minireeks is in Engels oorgeklank en bestaan uit agt episodes.
Verwysings
[wysig | wysig bron]- Morris, Ron. 2000. "Bangkok Dispatch", Future Frame (besoek op 17 Oktober 2006).
Eksterne skakels
[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
