Rust-en-Vreugd

in Wikipedia, die vrye ensiklopedie
(Aangestuur vanaf Rust en Vreugd)
Jump to navigation Jump to search
Rust-en-Vreugd
Rust-en-Vreugd se voorstoep

Rust-en-Vreugd in Buitenkantstraat is een van die weinige 18de-eeuse huise wat in Kaapstad oorgebly het. Dit is in 1940 tot nasionale gedenkwaardigheid verklaar en huisves nou 'n deel van die William Fehr-versameling.

Die huis[wysig | wysig bron]

Tot aan die einde van die 19de eeu was die huis geleë op 'n ruim landgoed. Willem Cornelis Boers het dit tussen 1777 en 1782 besit en die indrukwekkende huis in 1778 laat bou. Die grondplan van die dubbelverdiepinghuis met 'n plat dak is tipies van die 18de-eeuse dorpshuis. Hierdie swierige huis gee 'n goeie idee van hoe die senior personeel van die VOC aan die Kaap geleef het. Opvallend van die huis is sy vooraansig – veral sy stoep, balkon en vier Korinthiese suile. Louis Thibault het die vooraansig ontwerp, Anton Anreith was die verantwoordelik vir die houtwerk van die stoep en die mooi voordeur en die bouer was Hermann Schutte. Die pilare, voordeur, balkondeur en die boligte van kiaathout en die houtsneewerk is deur Anreith. Op die grondvlak is twee sitkamers, eetkamer, spens, kombuis en slaapkamers en agter die binnehof. Bo was nog 'n sitkamer, nog meer slaapkamers, 'n badkamer, pakkamers en balkon.

Die hekke[wysig | wysig bron]

In die oorspronklike hekke van Rust en Vreugd staan die datum 1778. Hierdie smeeysterhekke is in 1878 verkoop aan 'n gemeente in Penkridge in Staffordshire, Engeland.

Bewoners[wysig | wysig bron]

Die regsgeleerde W.C. Boers was die fiskaal aan die Kaap, maar hy was so betrokke by korrupsie en magsmisbruik dat hy op versoek van die bevolking na Nederland moes terugkeer. In 1782 was Olof G. de Wet, ook 'n VOC-amptenaar, die eienaar. Hy verkoop dit in 1785 aan Jean Martin, 'n Franse geneesheer. In 1798 was die weduwee van Johannes Blösser die eienaar en daarna van R.J. van der Riet, 'n lid van die Politieke Raad. Tussen 1814 en 1826 was dit die residensie van die goewerneur, lord Charles Somerset. Later was die bewoner William Hopper en daarna sy seun. Die Hoppers herdoop die huis na The Grove. In 1860 verander die naam na Rustenburg Gardens en word die huis en die tuin oopgestel vir die publiek. Vanaf Julie 1885 was dit 'n onderwyserskollege (Normaal School, Kaapstad), staatsgastehuis, 'n skool, en 'n verplegingskollege. Met verloop van tyd het die landgoed weens verstedeliking verklein en het die gebou agteruitgegaan totdat die Kaapse Provinsiale Administrasie dit gerestoureer het en die William Fehr-versameling daarin gevestig het. Die huis en die deel van die landgoed wat oorgebly het, is 'n sieraad vir Kaapstad.[1]

Bibliografie[wysig | wysig bron]

  • Green, Eldred: Rust en Vreugd and its pictures. Lantern, April 1979, Jaargang 28, nr. 2.

Koördinate: 33°55′48.42″S 18°25′14.23″O / 33.9301167°S 18.4206194°O / -33.9301167; 18.4206194