Ruud van Nistelrooy

Ruud van Nistelrooy

Van Nistelrooy in 2017
Persoonlike inligting
Geboortenaam	Rutgerus Johannes Martinus van Nistelrooij
Geboortedatum	1 Julie 1976 (1976-07-01)
Geboorteplek	Oss, Noord-Brabant, Nederland
Lengte	1,88 m
Speelposisie	Aanvaller
Jeugloopbaan
1981–1990	Nooit Gedacht
1990–1991	RKSV Margriet
1991–1993	Den Bosch
Seniorloopbaan*
Jare	Span	Kere†	(Doele)†
1993–1997	Den Bosch	69	(17)
1997–1998	Heerenveen	31	(13)
1998–2001	PSV Eindhoven	67	(62)
2001–2006	Manchester United	150	(95)
2006–2010	Real Madrid	68	(46)
2010–2011	Hamburger SV	36	(12)
2011–2012	Málaga	28	(4)
Totaal		449	(249)
Nasionale span
1997–1998	Nederland o/21	4	(0)
1998–2011	Nederland	70	(35)
Spanne bestuur
2021–2022	Jong PSV
2022–2023	PSV
2024	Manchester United (waarnemend)
2024–2025	Leicester City
* Kere vir seniorklub uitgedraf en doele is net vir die plaaslike liga.. † Kere uitgedraf (Doele).

Rutgerus Johannes Martinus van Nistelrooij (gebore 1 Julie 1976), algemeen bekend as Ruud van Nistelrooy, is ’n Nederlandse professionele sokkerafrigter en voormalige speler. Van Nistelrooy word wyd beskou as een van die beste doelskieters van sy generasie. Hy was drie keer die topskieter in die UEFA Champions League en is tans sesde op die algehele lys van topskieters in dié kompetisie, met 56 doele. Hy was ook die topskieter in drie verskillende Europese plaaslike ligas. In 2004 is hy opgeneem in die FIFA 100, ’n lys van die wêreld se grootste lewende spelers.

Van Nistelrooy het sy loopbaan by Den Bosch begin, en daarna na Heerenveen verhuis, voordat hy sy naam gevestig het by PSV Eindhoven, waar hy twee Eredivisie-titels gewen het. Sy indrukwekkende doelskoprekord by PSV het die aandag van Manchester United getrek. ’n Ooreenkoms is reeds in die somer van 2000 bereik, maar weens beserings is die oorgang eers ’n jaar later voltooi teen ’n destydse Britse rekordbedrag van £19 miljoen. Sy tyd by United was suksesvol – hy het die Premierliga, FA-beker, Ligabeker en die FA Community Shield gewen, en is twee keer as Sir Matt Busby Speler van die Jaar aangewys. Van Nistelrooy het 150 doele in slegs 219 wedstryde vir United aangeteken en was destyds hul voorste doelskieter in Europese kompetisie, maar het aan die einde van sy verblyf uit guns geval. Real Madrid het hom in 2006 onder kontrak geneem. Alhoewel beserings die einde van sy tyd by Madrid beïnvloed het, het hy La Liga twee keer gewen, asook die Supercopa de España, voordat hy in Januarie 2010 by Hamburger SV aangesluit het. Ná een en ’n halwe seisoen in Hamburg het hy in die somer van 2011 na Málaga in Spanje verhuis. Hy het in 2012 as speler afgetree.

Internasionaal het Van Nistelrooy 70 keer vir Nederland gespeel en 35 doele aangeteken. Hy het aan die Europese Kampioenskappe in 2004 en 2008 deelgeneem, asook aan die Wêreldbekertoernooi in 2006.