Sammy Marks-fotoversameling

in Wikipedia, die vrye ensiklopedie
Jump to navigation Jump to search
Marks en sy familie tydens 'n besoek aan Engeland. Van links na regs: Girlie 1889, Joe 1892, Dolly 1897, Sammy, Louis 1885, Bertha en Phil 1900. Ted 1894 is nie teenwoordig nie.

Die Sammy Marks-versameling bestaan uit historiese foto's wat 'n Suid-Afrikaanse gesin se vryetydsbesteding tydens die laat-Victoriaanse en Edwardiaanse tydperk uitbeeld. Hierdie foto's vorm 'n belangrike bron van inligting vir die bestudering van kultuurgeskiedenis.

Sammy Marks, sy vrou en hul 8 kinders het in die huis Zwartkoppies Hall buite Pretoria gewoon. Hulle was 'n tipiese welgestelde middelklas Engelssprekende gesin in die tyd in Suid-Afrika. 'n Groot aantal informele foto's van die gesin se doen en late het bewaar gebly en word bewaar in die Sammy Marks Museum wat in die huis gevestig is. Persoonlike briewe van die gesinslede is in die besit van die Universiteit van Kaapstad.

Onderwerpe van die foto's is onder andere verjaardags-, tee- en kinderpartytjies, danse, Kersfeesvierings, onthale van die hoëlui, biljartspel, pieknieks, roei op die plaasdam, reise per motor, besoek aan die warmbron by Caledon, vakansie by Muizenberg, tennis-, croquet-, gholf- en krieketwedstryde en foto's van hul groot personeel.

Ander bekende Suid-Afrikaanse fotoversamelings is die Elliott-versameling, die Gordon-versameling, die Gribble-versameling, die Ravenscroft-versameling en die Duggan-Cronin-versameling.