Sergio Agüero
 Agüero by die Wêreldbekertoernooi in 2018 | |||
| Persoonlike inligting | |||
|---|---|---|---|
| Geboortedatum | 2 Junie 1988[1] | ||
| Geboorteplek | Buenos Aires, Argentinië[2] | ||
| Lengte | 1,73 m | ||
| Speelposisie | Doelskieter | ||
| Jeugloopbaan | |||
| Loma Alegre | |||
| Los Primos | |||
| 1997–2003 | Independiente | ||
| Seniorloopbaan* | |||
| Jare | Span | Kere† | (Doele)† |
| 2003–2006 | Independiente | 54 | (23) |
| 2006–2011 | Atlético Madrid | 175 | (74) |
| 2011–2021 | Manchester City | 275 | (184) |
| 2021 | Barcelona | 4 | (1) |
| Totaal | 508 | (282) | |
| Nasionale span | |||
| 2004 | Argentinië o/17 | 5 | (3) |
| 2005–2007 | Argentinië o/20 | 11 | (6) |
| 2008 | Argentinië o/23 | 5 | (2) |
| 2006–2021 | Argentinië | 101 | (41) |
| * Kere vir seniorklub uitgedraf en doele is net vir die plaaslike liga.. † Kere uitgedraf (Doele). | |||
Sergio Leonel Agüero del Castillo (gebore 2 Junie 1988), beter bekend as Kun Agüero, is ’n voormalige Argentynse professionele sokkerspeler wat as ’n doelskieter (aanvaller) gespeel het. Hy word gesien as een van die beste doelskieters van sy tyd en een van die beste spelers in die geskiedenis van die Engelse Premierliga. Hy het van 2011 tot 2021 vir Manchester City gespeel, waar hy die klub se topskieter van alle tye is – en hy hou die rekord vir die meeste Premierliga-hat-tricks – drie doele in ’n wedstryd – ’n prestasie wat hy in 12 verskillende wedstryde behaal het.
Agüero het sy loopbaan begin by Independiente in Argentinië. Op 5 Julie 2003, toe hy net 15 jaar en 35 dae oud was, het hy die jongste speler geword om in die Argentynse Primera División te speel. Hy het hiermee ’n rekord gebreek wat vir 27 jaar gehou het en wat voorheen deur sy toekomstige skoonpa, Diego Maradona, gestel is. In 2006 het Agüero vir Atlético Madrid in Spanje gaan speel vir ’n oordragsfooi van €23 miljoen. Daar het hy bekend geword as een van die beste jong spelers in die wêreld.
In 2011 het hy by Manchester City aangesluit vir ongeveer £35 miljoen. In sy 10 jaar daar het hy vyf ligatitels gewen. In sy eerste seisoen het hy ’n baie belangrike laaste-minuut-doel aangeteken wat Manchester City se eerste ligatitel in 44 jaar verseker het. Hy het ook ses EFL-bekers, een FA-beker, en het in die klub se eerste UEFA Champions League-finaal gespeel. Agüero het ’n Golden Boot gewen en is twee keer in die PFA-span van die jaar ingesluit. Hy is die sesde hoogste doelskieter in Premierliga-geskiedenis en die tweede hoogste buitelandse speler met 184 doele. In 2021 het hy gratis by Barcelona aangesluit, maar moes in dieselfde jaar uittree op die ouderdom van 33 weens hartprobleme. Hy het net vier wedstryde vir Barcelona gespeel, maar het een doel aangeteken in sy eerste El Clásico.
Vir Argentinië het Agüero in die onder-20-span gespeel wat die Wêreldbekers in 2005 en 2007 gewen het. By die 2008 Olimpiese Spele het hy twee doele teen Brasilië in die halfeindstryd aangeteken, en uiteindelik saam met die span die goue medalje gewen. Hy is Argentinië se derde hoogste doelskieter van alle tye en het meer as 100 wedstryde vir die nasionale span gespeel, insluitend drie Wêreldbekers (2010, 2014, 2018) en vyf Copa Américas (2011, 2015, 2016, 2019, 2021), en het in 2021 die Copa América gewen.
Agüero was getroud met Diego Maradona se dogter, Giannina Maradona. Hulle is in 2008 getroud en het ’n seun, Benjamin, wat in Februarie 2009 in Madrid, Spanje, gebore is.[3] Agüero en Giannina het in 2012 geskei, wat vir Diego teleurstellend was.[4][5]
Verwysings
[wysig | wysig bron]- ↑ "Ficha". Official Site. Geargiveer vanaf die oorspronklike op 28 Januarie 2016. Besoek op 14 Januarie 2016.
- ↑ "Bio". sergioaguero.com. Sergio Agüero's Official Site. Geargiveer vanaf die oorspronklike op 2 April 2019. Besoek op 11 Mei 2016.
- ↑ "Maradona a grandad as Aguero Jr is born". FourFourTwo (in Engels). 19 Februarie 2009.
- ↑ Fitzgerald, Todd (4 Januarie 2013). "Manchester City's Sergio Aguero splits from wife of four years". Manchester Evening News. Besoek op 10 Junie 2020.
- ↑ Akerman, Nick (31 Oktober 2013). "Diego Maradona Calls Sergio Aguero a Wimp and Demands Showdown over Daughter". Bleacher Report (in Engels). Besoek op 10 Junie 2020.
Eksterne skakels
[wysig | wysig bron]
Wikimedia Commons het meer media in die kategorie Sergio Agüero.
