Shaker Museum Mount Lebanon
Die Shaker Museum | Mount Lebanon, tans geleë in New Lebanon, is in 1950 deur John S. Williams, Sr. op sy plaas in Old Chatham in die Amerikaanse deelstaat New York gestig.
Die huidige museum en navorsingsbiblioteek dek die geskiedenis van die Shakers, meer formeel bekend as die United Society of Believers in Christ's Second Appearing, 'n charismatiese Protestantse denominasie wat deur Ann Lee en haar volgelinge in 1774 in Amerika gestig is en daar 'n tiental utopiese nedersettings gevestig het. Die museum se versamelings van voorwerpe en boeke behandel die daaglikse lewe en kultuur van Shaker-gemeenskappe in 'n outentieke historiese omgewing.
Williams het vanaf die 1930's gereeld besoeke gebring aan destyds aktiewe Shaker-gemeenskappe om voorbeelde van hul kunswerke, nywerhede, huislike lewe en godsdienstige voorwerpe te koop en te versamel. Sy benadering was dié van van 'n antropoloog wat met sy werk die agteruitgang van 'n beskawing gedokumenteer het. Dikwels het Shakers hom aktief gesteun en versamelstukke aan hom geskenk.
Vandag word die Shaker Museum se versameling van voorwerpe en biblioteek met meer as 56 000 items as die omvattendste versameling oor die Shakers en as 'n primêre bron vir navorsing deur wetenskaplikes en kurators beskou. Sedert 1972 is die museum deur die Amerikaanse Vereniging van Museums (American Association of Museums) geakkrediteer.
In 2004 het die museum die eienaar en bestuurder van die North Family-terrein in Mount Lebanon Shaker Village geword, met elf oorblywende Shaker-geboue op 30 akkers wat deel uitmaak van die Mount Lebanon Shaker National Historic Landmark-distrik. 'n Bykomende 61 akkers, die sogenaamde North Pastures-weivelde, is in 2014 aangekoop. Die historiese Shaker-nedersetting word deur die Shaker Museum ontwikkel om sy versamelings te huisves en programme vir die breë publiek aan te bied.