Sile

in Wikipedia, die vrye ensiklopedie
Sile
Die brug Ponte San Martino oor die Sile in Treviso
Die brug Ponte San Martino oor die Sile in Treviso
Die brug Ponte San Martino oor die Sile in Treviso
Oorsprong Fontanassa dea Coa Longa
Monding naby Porto di Piave Vecchia
Adriatiese See
Stroomgebied Veneto, Italië
Lengte 95 km
Oorspronghoogte 28 m
Mondinghoogte 0 m
Stroomgebiedopp. 628 km²

Die Sile (Venesiaans: Sil /'sil/ of Siłe /'siːe/) is 'n rivier in die Noordoos-Italiaanse administratiewe streek Veneto wat in die Adriatiese See uitmond. Met 95 km is dit die langste rivier in Italië wat uit sogenaamde risorgive ontspring, 'n soort Karstbronne.

Historiese waterwiele in die Oasi Cervara

Die rivier se hoofbronne is sowat 20 km wes van Treviso naby Casacorba di Vedelago (provinsie Treviso) en Torreselle di Piombino Dese (provinsie Padua) geleë[1]. Die rivier vertak in talle waterare voordat dit deur Treviso vloei. Die Sile staan bekend vir sy helder en suiwer water wat dit gewild maak by hengelaars. Watervloei en -peile is konstant, ook tydens sterk reënval, sodat die Sile al vroeg as veilige waterweg gebruik is wat Treviso met Venesië verbind het. Langs sy oewers het meule en papierfabrieke ontstaan waarvan sommige gerestoureer is.

Die rivierloop en -monding is in 1683 deur die Venesiaanse owerheid verander om waterpeile in die Venesiaanse strandmeer te reguleer en vermoddering te voorkom. Die Sile is destyds in die Piave-rivierbed omgelei. Dele van die riviergebied is in die 1960's drooggelê wat die rivierlandskap se aantreklikheid vir toeriste ietwat verminder het. Intussen word 'n groter deel van die rivierlandskap beskerm as Parco naturale regionale del Fiume Sile.

Verwysings[wysig | wysig bron]

  1. Raffaele Folliero: Ri...scoprire Treviso. Guida completa per amarla e gustarla. 2o Edizione Febbraio 2017. Treviso (TV): Editoriale Programma 2017, bl. 39