Soekor

Soekor was ‘n staatsgefinansierde maatskappy, gestig in 1965, met as doel die soektog na olie in Suid-Afrika.

Maatskappy

Die Suidelike Olie-eksplorasiekorporasie (meer algemeen bekend onder die akroniem Soekor) moes aktief deelnaam aan en ander firmas aanmoedig en aanspoor tot ‘n versnelde soektog na aardolie. In 2002 het dit saamgesmelt mett Mossgas en dele van die Senetrale Energiefonds onder die nuwe naam van PetroSA.

Doel

Olievondste sou die land se ekonomie aanhelp, werksgeleenthede skep, buitelandse valuta bespaar en bowenal Suid-Afrika selfversorgend maak, veral in die tye toe die land in die apartheidsjare gebuk gegaan het onder boikotte.

Op land

Soekor was aanvanklik besig om te prospekteer in die omgewing van Beaufort-Wes. Noemenswaardige maar beperkte hoeveelhede gas is op die plaas Cranemere (tussen Graaff-Reinet en Pearston) gevind en klein hoeveelhede olie by Colchester, Dannhauser en Wakkerstroom. Van 1972 tot 1975 het Soekor 54 boorgate op land gesink. In Desember 1978 is die landsoektog gestaak, want daar is besef dat daar geen goeie kans is om groot ekonomiese ontginbare olie- en gasvelde te vind nie.

Op see

In 1968 het die soektog na olie voor die kus begin. ‘n Boorgat 60 km suid van Plettenbergbaai het ‘n beduidende hoeveelheid gas opgelewer. Gedurende April 1974 het die boorplatform Sedco 135 ‘n gasontdekking wes van die mond van die Oranjerivier gedoen. In die jare daarna was die seebore Sedco K en Sedco 708 aan die kus bedrywig en vind aanduidings van gas en olie. Boorgate 90 km suid van Mosselbaai het in Desember 1980 1,58 miljoen m³ gas en 1200 vaatjies oliekondensaat per dag gelewer. Twee jaar later lewer ‘n boorgat 135 km suid van Mosselbaai 900 vaatjies en 90600 m³ gas per dag. Dit was van ‘n goeie gehalte, maar nie in groot genoeg hoeveelhede om dit ekonomies te ontgin nie. Die soektog op see en land is weer voortgesit. Op 28 Februarie 1985 word 82 km suidwes van Mosselbaai die beste vonds nog in die land gemaak. Die veld lewer elke dag ‘n 2600 vate ru-olie en ‘n beduidende hoeveelheid gas en die gevolg hiervan is die aanleg van die fabriek wat aardgas tot sintetiese brandstof verwerk.

Lees ook

Bibliografie

Ensiklopedie van die Wêreld, deel 14. Supplement. Stellenbosch: Albertyn, 1994. ISBN 0-949948-36-5
crwflags.com/fotw/flags/za$soek.html/
keyfactsenergy.com/media/country_review/South_Africa_ynvLxop.pdf
petrosa.co.za