Solomon Mahlangu

in Wikipedia, die vrye ensiklopedie
Jump to navigation Jump to search
Solomon Mahlangu
Geboortenaam Solomon Kalushi Mahlangu
Gebore 10 Julie 1956
Mamelodi, Pretoria, Suid-Afrika
Oorlede 6 April 1979 (op 22)
Pretoria, Suid-Afrika
Ouers Martha Mahlangu
Beroep student, guerilla
Politieke party African National Congress, Umkhonto we Sizwe

Solomon Kalushi Mahlangu (10 Julie 19566 April 1979) was 'n Suid-Afrikaanse lid van die African National Congress (ANC) se militêre vleuel, Umkhonto we Sizwe (MK). Hy is aan moord skuldig bevind en is in 1979 gehang.[1][2]

Vroeë jare[wysig | wysig bron]

Mahlangu is op 10 Julie 1956 in Pretoria gebore. Hy was die tweede seun van Martha Mahlangu, 'n huishulp. Sy vader verlaat hulle in 1962, waarna hy deur sy ma grootgemaak is. Hy woon Mamelodi Hoërskool tot standaard 8 by, maar kon, as gevolg van die onluste, nie sy skoolopleiding voltooi nie.[3]

Militêre opleiding[wysig | wysig bron]

In 1976 vlug hy na Mosambiek en spandeer ses maande in ʼn vlugtelingkamp naby Xai Xai. Daarna word hy geneem na ʼn ANC opleidingkamp, genaamd "Engineering", in Angola. Daar en by Funda-kamp het hy opleiding ontvang in sabotasie, gevegskuns, verkenning en politieke opleiding.[4] Na sy opleiding is hy, George ‘Lucky’ Mahlangu en Mondy Motloung na Swaziland geneem waar hulle reistasse vol pamflette, gewere en handgranate gegee is. Daarna op 11 Junie 1977 het hulle die grens oorgesteek en hul weg na Johannesburg gebaan.[5]

Arrestasie[wysig | wysig bron]

Die drie kamerade het in Diagonalstraat in 'n taxi geklim, maar 'n polisieman het onraad gemerk toe hy hul groot tasse sien. Die polisieman het een van die tasse gegryp en 'n AK-47 en 'n handgranaat het uitgeval. Al drie het toe op die vlug geslaan. Lucky het eenkant toe gehardloop en Mahlangu en Motlaung het in die rigting van Fordburg gevlug. In Gochstraat het die twee gaan skuiling soek in die pakkamer van John Orr's en binnekant het hulle twee werknemers van John Orr's, Rupert Kessner en Kenneth Wolfendale, doodgeskiet en nog twee gewond. Beide voortvlugtendes is daarna gearresteer en aangehou.[6]

Verhoor[wysig | wysig bron]

Mahlangu se verhoor het ʼn aanvang geneem op 7 November 1977. Hy is bygestaan deur twee advokate, mnre Ismail Mohamed S.C. en Clifford Mailer. Hy is aangekla op twee aanklagtes van moord, twee van poging tot moord en verskeie aanklagtes ingevolge die Wet op Terrorisme. Die hof het bevind dat Mahlangu en Motlaung met ʼn gemeenskaplike doel opgetree het en gevolglik dat dit nie saak gemaak het wie die skietwerk gedoen het nie. Mahlangu is skuldig bevind op alle aanklagtes. Geen versagtende omstandighede is bewys nie en Mahlangu is ter dood veroordeel. Sy aansoeke om verlof om te appelleer is afgewys. Mahlangu is op 6 April 1979 opgehang. [7]

Waarheid-en-versoeningskommissie[wysig | wysig bron]

Die kommissie het Mahlangu en Motlaung se geval ondersoek en bevind dat beide verantwoordelik was vir mnr Rupert Kessner en Kenneth Wolfendale se dood en skuldig was aan growwe vergrype van menseregte. Dit het ook bevind dat die ANC en die bevelvoerder van MK aan sodanige vergrype skuldig was.[8]

Eerbewyse[wysig | wysig bron]

  • Mahlangu is in Atteridgeville begrawe. Hy is op 6 April 1993 in Mamelodi herbegrawe. Daar is ʼn gedenkplaat wat glo lees: "Vertel my mense dat ek hulle liefhet en dat hulle moet aanhou veg, my bloed sal die boom voed wat die vrugte van vryheid sal dra, Aluta continua."[9]
  • In Tanzanië is die Solomon Mahlangu Freedom College (SOMAFCO)opgerig. [10]
  • Op 27 September 2005 is die orde van Mendi vir Dapperheid in goud aan hom toegeken deur die Staatspresident.[11]
  • In 2005 is daar 'n standbeeld van Mahlangu in Mamelodi opgerig. [12]
  • Op 6 April 2009 het die poskantoor 'n posseël uitgereik om sy dood 30 jaar tevore te herdenk. [13]

Verwysings[wysig | wysig bron]

  1. "SOMAFCO : The Solomon Mahlangu Freedom College – Solomon Mahlangu". somafcotrust.org.za. Besoek op 16 Maart 2014.
  2. "Solomon Mahlangu: Fighter Against Apartheid". anc.org.za. Besoek op 16 Maart 2014.
  3. "ANC statement on the execution of Solomon Mahlangu". anc.org.za. Besoek op 16 Maart 2014.
  4. http://www.sahistory.org.za/people/solomon-kalushi-mahlangu
  5. http://www.sahistory.org.za/people/solomon-kalushi-mahlangu
  6. Truth and Reconciliation Commission Report, volume 3, p. 592, para. 227; http://www.sahistory.org.za/people/solomon-kalushi-mahlangu
  7. http://www.sahistory.org.za/people/solomon-kalushi-mahlangu
  8. Truth and Reconciliation Commission Report, volume 3, page 592, para. 592-4
  9. "'My blood will nourish the tree that will bear the fruits of freedom. Tell my people that I love them. They must continue the fight.'". amandla.org.za. Besoek op 16 Maart 2014.. SAhistory.org.za gebruik die woorde:"his supposed last words."
  10. http://www.sahistory.org.za/people/solomon-kalushi-mahlangu
  11. http://www.thepresidency.gov.za/pebble.asp?relid=7630
  12. http://www.sahistory.org.za/people/solomon-kalushi-mahlangu
  13. http://www.sahistory.org.za/people/solomon-kalushi-mahlangu