Sparassodonta

in Wikipedia, die vrye ensiklopedie

Sparassodonta †
Tydperk: PaleoseenHoloseen, 64–0.1 m. jaar gelede
Thylacosmilus
Wetenskaplike klassifikasie e
Domein: Eukaryota
Koninkryk: Animalia
Filum: Chordata
Klas: Mammalia
Klade: Marsupialiformes
Orde: Sparassodonta
Familie
  • Borhyaenidae †
  • Hathliacynidae †
  • Mayulestidae †
  • Proborhyaenidae †
  • Prothylacinidae †
  • Thylacosmilidae †

Die Sparassodonta[1] is 'n orde van uitgestorwe buideldiere wat van die vroeë Paleoseen tot die laat Pleistoseen in Suid-Amerika geleef het. Hulle het lank die oorheersende karnivore op hierdie eilandkontinent gewees en het vorme voortgebring wat die ekologiese nis van die plasentale Roofdiere op ander kontinente ingeneem het. [2]

Die orde het 'n groot verskeidenheid geken. Die Sparassodonta het ses families bevat:

  1. Borhyaenidae
  2. Hathliacynidae
  3. Mayulestidae
  4. Proborhyaenidae
  5. Prothylacinidae
  6. Thylacosmilidae

Sparassodonte was dikwels karnivore, hoewel van hulle ook omnivoor was. Daar was spesies soos Mayulestes (Mayulestidae) wat soos 'n wesel gelyk het maar Proborhyaena (Proborhyaenidae) het soos 'n beer gelyk. Sy skedel was 60 cm lank en dit was die grootste buidelkarnivoor. Thylacosmilus (Thylacosmilidae) het soos die sabeltandkat Smilodon gelyk met lang slagtande. Dit is 'n goeie voorbeeld van konvergente evolusie, want hulle was glad nie verwant nie. Sipalocyon en Cladosictis (altwee Hathliacynidae) het teenoorgeleë duime wat aangee dat hulle bome kon klim.

Daar is lank gedink dat die uitsterwe van hierdie groep veroorsaak is deur die ontstaan van die landengte van Panama en die mededinging deur plasentale karnivore waar hulle aan blootgestel is. Die verval het egter reeds in die Oligoseen begin en hulle het ook mededinging van ander groepe soos die groot karnivoriese voëls, die Phorusracoïede ondervind.[3]

Fotogalery[wysig | wysig bron]

Verwysings[wysig | wysig bron]

  1. Borhyaeniede word soms as sinoniem gebruik, maar dit is eintlik net een familie hiervan.
  2. The Princeton Field Guide to Prehistoric Mammals Donald R. Prothero Princeton University Press, 2016, ISBN 1400884454, ISBN 9781400884452, bls 39
  3. Emerson M. Vieira, Diego Astúa de Moraes in: Predators with Pouches: The Biology of Carnivorous Marsupials, Csiro Publishing, 2003, ISBN 0643066349, ISBN 9780643066342