Parnassos

Parnassos
Die Berg Parnassos
Ligging	sentraal-Griekeland
Hoogte	2 455 meter bo seevlak
Koördinate	38°32′6″N 22°37′20″O
Bergtipe	Berg

Die Berg Parnassos is 'n kalksteenberg in sentraal-Griekeland wat uittoring bo Delphi, noord van die Golf van Korinthe, en bied skone uitsigte van die omliggende olyfboorde en landskap. Volgens Griekse mitologie, was hierdie berg heilig vir Apollo en die Korikiaanse nimfe, asook die tuiste van die Muse. Die berg is ook voorrang gegee deur die Doriërs. 'n Vermoede bestaan dat *Parna- afgelei is uit dieselde woordstam as die Luwiaanse woord vir "huis".

Mitologie

Nicolas Poussin se tekening van Apollo en die Muse op Berg Parnassos

Orpheus, lewe en gebeure in Parnassos

Berg Parnassos is vernoem na Parnassos, die seun van die nimf Kleodora en die man Kleopompos. 'n Stad, waarvan Parnassos die leier was, sou deur 'n vloed getref gewees het, en die burgers daarvan sou, om van die vloed te ontsnap, bergop in die rigting van 'n wolfsgehuil gevlug het. Daar het die oorlewendes 'n ander stad gebou, en dit Lykoreia genoem, wat in die Grieks beteken "die gehuil van die wolwe". Terwyl Orpheus op Parnassos gewoon het by sy moeder en sy agt aantreklike tantes, het hy Apollo ontmoet wat die laggende muse Thalia die hof gemaak het. Orpheus het Apollo welgeval, en het aan hom 'n klein goue lier gegee, en hom geleer om dit te bespeel. Orpheus se moeder het hom geleer om te vers vir sang. Soos die Orakel van Delphi aan die god Apollo geheilig is, so het die berg self ook 'n verbintenis met Apollo verkry. Volgens sommige tradisies, is Parnassos die ligging van die fontein Kastalia en die tuiste van die Muse; volgens ander tradisies het daardie eer Berg Helikon toegekom, 'n berg van dieselde bergreeks. As die tuiste van die Muse, het Parnassos bekend geword as die tuiste van digtery, musiek en opvoeding.

Parnassos was ook die ligging van verskeie onverwante mindere gebeure in Griekse mitologie.

• In sekere weergawes van die Griekse watervloedmite, het die ark van Deukalion op die hange van Parnassos te ruste gekom. Dit is die weergawe van die mite wat in Ovidius se Metamorphose aangehaal word.
• Orestes het sy tyd as vlugteling op die Berg Parnassos deurgebring.
• Parnassos was ook vir 'n tyd geheilig aan die god Dionysos.
• Die Korykiaanse grot, geleë op die hange van Parnassos, was geheilig aan Pan, asook aan die Muse.

Parnassos was ook die tuiste van Pegasos, die gevleuelde perd van Bellerophon.

Parnassos as 'n metafoor

Berg Parnassos

Die naam "Parnassos" in die literatuur verwys tipies na die onderskeiding daarvan as tuiste vir digtery, literatuur en geleerdheid; die Montparnasse voorstad in Parys, Frankryk, byvoorbeeld, dra sy naam weens die vele literatuurstudente wat gedigte in die strate voorgelees het, en dit gevolglik "(le) Mont Parnasse" genoem het.

Parnassos vandag

Vandag is twee ski-oorde op die helling van die berg Parnassos geleë. Die Parnassos Ski-oord bestaan uit twee sentrums, Kellaria en Fterolakka, wat tesame die grootste ski-oord van Griekeland uitmaak. 'n Kleiner ski-oord (met twee sleep-hysers), genaamd Gerontovrahos is geleë oorkant 'n brug na Kellaria. Parnassos word gemyn vir die digte neerslae van bauxite wat om die beurt in aluminium oksied en aluminium verwerk word.

Die aanlê van die ski-oord het in 1975 'n aanvang geneem en is in 1976 voltooi, toe die eerste twee sleep-hysers by Fterolaka in werking gestel is. In 1981 is die aanleg van 'n verdere ski-area in Kelaria voltooi, en tydens die winterseisoen van 1987–1988 is die stoel-hyser Hermes in werking gestel wat die twee ski-oorde verbind. Beide ski-oorde is toenemend uitgebrei en in 1993 is die eerste hoë-spoed quad in Griekeland geïnstalleer, naamlik Herkules. Vandag word die ski-oord bedryf met 14 hysers, 'n 4-sitplek kabelkar, 'n 4-sitplek hoë-spoed stoel-hyser, vier 3-sitplek hysers, een 2-sitplek stoel-hyser, en 6 sleephysers, met 'n maksimum kapasiteit van sowat 5,000 mense per uur. Die ski-oord spog met 25 afgemerkte ski-lopies en sowat 12 ski-roetes van 30km in totaal, met 'n langste lopie van sowat 4km in lengte.