Blu-ray-skyf

Hierdie Blu-ray Disc van Panasonic het twee lae met 'n stoorkapasiteit van 50 GB

Die Blu-ray Disc (afkorting: BD, letterlik "Bloustraalskyf") is die huidige standaard vir hoë-resolusie-DVD-rolprente. 'n Mededingende formaat, High-Definition-DVD, is onder meer deur Toshiba bemark, maar intussen gestaak.

Blu-ray-tegnologie en -spelers is gemik op die verbruikersmark, terwyl professionele gebruikers twee variante ter beskikking sal hê - die Professional Disc for Data (PDD), wat as stoormedium vir gewone gegewens dien, en die Professional Disc for Broadcast (PDB), wat as medium vir die uitsaaibedryf ontwikkel is.

Die tegniese besonderhede van die Blu-ray Disc is op 19 Februarie 2002 deur die nege stigterslede van die Blu-ray Group vasgelê; naas Matsushita, Pioneer, Philips, Sony, Thomson, LG Electronics, Hitachi, Sharp en Samsung het ook Dell, Hewlett-Packard, Apple en meer as 150 ander ondernemings by die vereniging aangesluit. Die Blu-ray Forum dien as organisatoriese raamwerk van die groep.

Blu-ray-spelers en -sagteware

Een van die eerste Blu-ray-spelers, wat deur Panasonic in 2005 bekend gestel is

Die eerste Blu-ray-spelers en -skywe het in 2006 op die Europese markte verskyn. Met pryse van meer as 1 000 € vir spelers en 30 € vir rolprente het die nuwe formaat aanvanklik 'n luukseproduk vir video-entoesiaste gebly. Sagteware-pryse in Noord-Amerika het egter reeds in laat 2006 tot omtrent 20 VSA-$ gedaal, en in September 2009 het die markprys vir intreevlak-spelers tot minder as $150 of €150 gedaal.

Tans is Denon en Oppo die enigste vervaardigers wat 'n kombinasie van Blu-ray, Super Audio CD en DVD-Oudio in een speler aanbied. Panasonic het in 2009 die eerste draagbare Blu-ray-speler bekend gestel. Sjabloon:Link FA