Rheinsberg

Rheinsberg
Ligging in Brandenburg	Wapen
Land	Duitsland
Deelstaat	Brandenburg
Distrik	Ostprignitz-Ruppin (OPR)
Koördinate	53°6′N 12°54′O
Stigting (eerste verwysing)	1335
Stadstatus	-
Oppervlakte:
- Totaal	324,83 vk km
Hoogte bo seevlak	61 m
Bevolking:
- Totaal (31 Desember 2010)	8 466
- Bevolkingsdigtheid	26/vk km
Tydsone	UTC +1 (MET)
- Somertyd	UTC +2
Klimaat
- Tipe	Gematigde klimaat
- Gemiddelde jaarlikse temperatuur	-°C
- Gem. temp. Januarie/Julie	-°C
- Gemiddelde jaarlikse neerslag	563 mm
Burgemeester	Jan-Pieter Rau (CDU)
Amptelike Webwerf	Rheinsberg

Rheinsberg is 'n stad in die administratiewe distrik Ostprignitz-Ruppin van die Duitse deelstaat Brandenburg. Die stad, wat aan die Rhinrivier geleë is, is volgens sy oppervlakte een van die grootstes in Duitsland.

Rheinsberg het danksy twee literêre werke bekendheid verwerf: Kurt Tucholsky se Rheinsberg: Ein Bilderbuch für Verliebte en die verwysing in Theodor Fontane se Wanderungen durch die Mark Brandenburg.

Rheinsberg, wat oorspronklik as Rynburg bekend gestaan het, was in die vroeë 13de eeu 'n waterkasteel naby die grens tussen die destydse streek Land Ruppin en Mecklenburg. Die oudste historiese dokument aangaande Rheinsberg verwys na die plaaslike Sint Laurentius-parogiekerk. Hierdie kerk is net soos die res van die stad vanaf 1740 volgens planne van die bekende Brandenburgse argitek Georg Wenzeslaus von Knobelsdorff (1699-1753) herbou.

Die kasteel van Rheinsberg met sy tuin word as dié argitek se vroegste meesterwerk beskou. Hier het die latere Pruisiese koning Frederik die Grote as kroonprins in aanraking met die filosofiese strominge van die Verligting gekom, sy briefwisseling met die Franse wysgeer Voltaire begin en saam met geestesverwantes konserte gegee. Die kasteel se spieëlsaal word steeds vir konserte gebruik.

Geografie

Een van die mere in Rheinsberg se omgewing

Rheinsberg is in die Rheinsbergse Meregebied te midde van talle groot en klein mere en in 'n afwisselende heuwelagtige boslandskap geleë. Dit word in die suide deur die Ruppiner Schweiz begrens, 'n boslandskap wat deel uitmaak van die Natuurpark Stechlin-Ruppiner Land. In die weste strek dit tot by die Kyritz-Ruppiner Heide wat vroeër deur Sowjet-magte as militêre oefenterrein gebruik is.

In klimatiese opsig verskil die gebied vanweë sy reliëf en die talle mere duidelik van sy omgewing. Groot hoeveelhede koue lug beweeg na die laer geleë dele sodat hier laer temperature aangeteken word. Dikwels daal die kwik nog laat in die lente en vroeg in die najaar benede vriespunt. Die gemiddelde jaarlikse reënval is met 563 mm relatief hoog. Die klimaat van Rheinsberg word dan ook deur hoë lugvogtigheid en relatief lae gemiddelde somertemperatue gekenmerk.