Edvard Grieg

Edvard Grieg

Noorse komponis, dirigent en konsertpianis

---

Musikale stroming
Romantiese musiek
Noorse nasionale Romantiek

---

Beduidende werke

• Klaviermusiek:

Lyriske stykker

• Dramatiese Musiek:

Peer Gynt

• Orkesmusiek:

Konsert vir klavier en orkes in A mineur, op. 16

---

Museum

• Edvard Grieg-museum Troldhaugen naby Bergen

Edvard Hagerup Grieg (* 15 Junie 1843 in Bergen, Noorweë; † 4 September 1907 in Bergen) was 'n Noorse Nasionaal-romantiese komponis.

Grieg is die bekendste van alle Noorse komponiste en het net soos Bjørnstjerne Bjørnson en ander laat 19de eeuse kunstenaars 'n belangrike bydrae tot Noorweë se kulturele nasiebou gelewer nadat die land die politieke unie met Swede verbreek en in 1905 onafhanklik geword het.

Grieg se bekendste werke is die Konsert vir klavier en orkes in A mineur, op. 16 en die twee suites Peer Gynt op. 46 en 55 en Fra Holbergs tid ("Uit Holberg se tyd") op. 40. In sy eie tyd - toe kamermusiek met sang een van die gewildste musikale genres was - het Grieg veral met sy 66 klavierminiature Lyriske stykker bekendheid verwerf. In Noorweë het hy as liedkomponis sukses met sy toonsetting vir gedigte van Aasmund Olavsson Vinje en Arne Garborg sukses behaal, terwyl hy in die buiteland met sy toonsetting van werke deur Henrik Ibsen, Hans Christian Andersen en Heinrich Heine gewild geraak het. Vanweë sy talryke kort klavierstukke is die omstrede bynaam "Chopin van die Noorde" aan hom gegee.

Reeds op die ouderdom van vyftien jaar het Grieg sy musikale studies aan die konservatorium te Leipzig in Duitsland begin. Later het hy 'n belangrike gedeelte van sy jeugjare in Kopenhagen deurgebring waar hy deur die eietydse Nasionaal-romantiese kunsstrominge beïnvloed is. Rigtingwysend vir sy persoonlike styl as komponis was sy ontmoeting met Rikard Nordraak. Grieg het bewus begin om Noorse vokale en instrumentele musiek as uitgangspunt vir sy komposisies te neem wat deur 'n hoogromantiese toonspraak gekenmerk was.

In 1866 het Grieg hom in Christiania (tans Oslo) gevestig waar hy Det Philharmoniske Selskab bestuur het. Ná 'n aantal rustelose jare het Grieg 'n huis in Hop i Fana net buite Bergen vir homself laat bou. In hierdie huis, Troldhaugen, het hy vir die res van sy lewe die somerhalfjaar deurgebring, terwyl hy gedurende die winter na die buiteland gereis het - by voorkeur op konsertreise en as gasdirigent of klaviersolis/-begeleier vir sy vrou, die sopraan Nina Hagerup.