Balkan

Definisie van die Balkanskiereiland waar die riviere Soča, Krka en Sava die grense van die gebied vorm.

Die Balkangebergte in Bulgarye en Serwië, nadat die Balkanskiereiland vernoem is.

Die Balkan (dikwels ook Balkanskiereiland genoem) is 'n geopolitiese en kulturele streek in Suidoos-Europa. Die skiereiland het 'n oppervlakte van 550 000 km² en 'n bevolking van meer as 50 miljoen. Die Balkan is een van drie Suid-Europese skiereilande in die Middellandse See en is vernoem ná die Balkangebergte in Bulgarye en Serwië.

Die streeksnaam is afgelei van die gelyknamige bergreeks wat van Oos-Bulgarye in weswaartse rigting tot by die Serwies-Bulgaarse grens loop. Die skiereiland word begrens van die Adriatiese See in die weste, van die Ioniese See in die suidweste, van die Egeïese See en die See van Marmara in die suidooste en die Swartsee in die ooste. Balkan is 'n oorspronklik Turkse term wat "beboste bergreeks" beteken. Die term het om politieke en historiese redes dikwels 'n negatiewe konnotasie. So word na die gebied alternatief as Suidoos-Europa verwys.

Lande wat geografies ten volle in die Balkanskiereiland geleë is (eilande uitgesluit):

•  Albanië
•  Bosnië en Herzegowina
•  Bulgarye
•  Griekeland
•  Kosovo
•  Masedonië
•  Montenegro

Lande wat grootliks in die Balkanskiereiland val:

•  Kroasië
•  Serwië

Lande wat grootliks buite die Balkanskiereiland lê:

•  Roemenië
•  Slowenië
•  Turkye