Vlag van Namibië

Vlag van Namibië

Vlag van Namibië
Gebruik	Nasionale vlag en vaandel
Verhouding	2:3
Goedgekeur	21 Maart 1990
Ontwerp	'n Vertikale driekleur in blou, rooi en groen waarvan die middelste rooi baan (met wit fraaiings) skuins oor die vlag loop met 'n goue son in die skildhoek.

Die vlag van Namibië is op 21 Maart 1990 aanvaar met Namibië se onafhanklikheidwording van Suid-Afrika. Die vlag is 'n vertikale driekleur in blou, rooi en groen met die rooi baan (met wit fraaiings) wat skuins oor die vlag loop van links onder (aan die vlagpaalkant) tot regs bo (aan die wapperkant).

Simboliek

Die woordvoerder van die subkomitee wat die vlag uitgekies het in 'n kompetisie waarin 850 ontwerpe ontvang is stel dit soos volg:

• Rooi - verteenwoordig Namibië se belangrikste hulpbron, sy mense. Dit verwys na hul heldhaftigheid en deursettingsvermoë om 'n toekoms van gelyke geleenthede vir almal te bou.
• Wit - verwys na eenheid en vrede.
• Groen - verteenwoordig die plantegroei en landbouhulpbronne.
• Blou - verteenwoordig die helder Namibiese lug en die Atlantiese oseaan, die land se kosbare waterhulpbronne en reën.
• Die goudgeel son stel lewe en lewenskrag, energie en warmte voor en die twaalf strale simboliseer die verskillende volke wat in Namibië woon.

Ontwerp

Die kleure van die vlag is ontleen aan die kleure van SWAPO, die belangrikste party in Namibië se stryd om onafhanklikheid. Die vlag is in 1971 aanvaar en bestaan uit drie diagonale strepe van blou, rooi en groen, die belangrikste kleure van die Ovambo's, die grootste etniese groep in Namibië. Die vlag verteenwoordig ook die Demokratiese Turnhalle-alliansie, 'n ander Namibiese politieke party. Rooi, wit en blou was die kleure van die Demokratiese Turnhalle-alliansie en blou, rooi en groen die kleure van SWAPO.

Konstruksietekening

Ander vlae

• 
  Vlag van die Namibiese Weermag
• 
  Vlag van die Namibiese President
• Vlag van die Namibiese polisie
  Vlag van die Namibiese polisie

Historiese vlae

• 
  Vlag van Duits-Suidwes-Afrika, 24 April 1884 tot 9 Julie 1915.
• 
  Voorgestelde vlag van Duits-Suidwes-Afrika (nooit gebruik), 1914.
• 
  Voorgestelde vlag van Duits-Suidwes-Afrika (nooit gebruik), 1914.
• 
  Vlag van Suidwes-Afrika, 9 Julie 1915 tot 28 Junie 1919.
• 
  Vlag van Suidwes-Afrika, 28 Junie 1919 tot 31 Mei 1928.
• 
  Vlag van Suidwes-Afrika, 31 Mei 1928 tot 21 Maart 1990.

Nadat die Duitse koopman Adolf Lüderitz in 1883 'n stuk grond by Angra Pequena laat aankoop het (die baai waar Lüderitz vandag is), is die gebied in 1884 verklaar tot die protektoraat Duits-Suidwes-Afrika. Slegs die enklave Walvisbaai het Britse gebied gebly. Die vlag van die Duitse Ryk, 'n swart-wit-rooi driekleur, is vir die gebied aangewys. Daar is later voorstelle gemaak vir 'n swart-wit-rooi vlag met 'n onderskeidende wapen in die middel van die wit baan, om Duits-Suidwes-Afrika te kan onderskei, maar daar het niks van gekom nie.

Na die uitbreek van die Eerste Wêreldoorlog het Suid-Afrikaanse troepe die gebied in 1915 beset. Tot 1990 het Suid-Afrika oor die gebied regeer, onder die naam Suidwes-Afrika. In hierdie periode het die onderskeie vlae van Suid-Afrika daar gewapper.

Sien ook

• Wapen van Namibië

Eksterne skakels

• (en) Namibië by Flags of the World