Chris Chameleon

Chris Chameleon is 'n Suid-Afrikaanse musiekkunstenaar en akteur. Hy het begin op die verhoog klim in 1989, toe hy die eerste DALRO Nasionale Akteurskompetisie gewen het. Daarna het hy vir vyf jaar in meer as 20 televisiereekse gespeel. Ook was hy die hoofsanger van 'n musiekgroep met die naam "Blue Chameleon", waarna hy Nederland toe gegaan het om vir 'n Nederlandse teatermaatskappy te werk.

Hy het teruggekeer na Suid-Afrika in 1996 waar hy twee jaar agter die skerms as assistentregisseur gewerk het. Aan die einde van 1997 het hy weer op die verhoog verskyn. Hierdie keer was dit as die voorman van die "Monki punk" band Boo!. Boo! het vinnig baie populêr geword, sowel in Suid-Afrika as in Europa. Na 800 vertonings in 7 jaar en in 17 lande het sy kollega's besluit om Boo! te ontbind.

Chris Chameleon het toe begin om die digkuns van Ingrid Jonker te toonset. Hierdie werk is uitgegee op die album Ek herhaal jou en het in 2005 landwyd gehore en resensente se verbeelding aangegryp. Chris het twee jaar gelede tydens 'n Boo!-toer in Nederland 'n dokumentêre program oor Ingrid Jonker gesien. Toe het die vervaardigers van die sepie 7de Laan vir hom gevra om 'n liedjie van 'n Afrikaanse digter te toonset om in die liedjie in die sepie te sing. Chris het besluit om dit te doen met Ingrid Jonker s'n. Later in 2005 het hy 'n album uitgebring, "Ek herhaal jou", wat net getoonsette gedigte van Ingrid Jonker bevat.

In Junie 2006 het hy nog twee albums uitgebring, 'n Engelstalige, Shine, en 'n Afrikaanstalige. In 2006 het die makers van die sepie 7de Laan hom opnuut uitgenooi om in die sepie te speel. Die Afrikaanstalige album 7de Hemel bevat liedjies wat sy karakter Liam in die sepie laat hoor het.