Pous Benedictus XVI

Benedictus XVI
Geboortenaam	Joseph Alois Ratzinger
Pontifikaat begin	19 April 2005
Pontifikaat eindig	28 Februarie 2013
Voorganger	Johannes Paulus II
Gebore	16 April 1927 Marktl, Duitsland
Ander pouse genaamd Benedictus

Pous Benedictus XVI (Latyns: Benedictus PP. XVI, gebore as Joseph Alois Ratzinger in Marktl, Duitsland, op 16 April 1927) was die 265ste pous van die Rooms-Katolieke Kerk tussen 2005 en 2013. Hy is op 19 April 2005 verkies tydens die konklaaf van April 2005, wat gehou is na die dood van Pous Johannes Paulus II. Op 28 Februarie 2013 het pous Benedictus XVI geabdikeer. Die naam ‘Benedictus’ beteken 'geseënde'.

Die Vatikaan het op 11 Februarie 2013 aangekondig dat pous Benedictus XVI op 28 Februarie 2013 sal bedank. Die vorige pous wat bedank het, was pous Gregorius XII in 1415.

Skoolopleiding

Pous Benedictus XVI het sy hoërskoolloopbaan met 'n abitur in die destydse Humanistische Gymnasium in Traunstein, Beiere (Duitsland) voltooi. Die skool het intussen van perseel gewissel en heet nou die Chiemgau Gymnasium.

Omstredenheid

Uitlatings oor die profeet Mohammed

Tydens 'n lesing wat pous Benedictus XVI tydens sy besoek aan die Duitse deelstaat Beiere (9 tot 14 September 2006) op 12 September aan die Universiteit van Regensburg gehou het, het hy groot ontsteltenis in die Islamitiese wêreld veroorsaak. Benedictus XVI het kritiese uitlatings oor die profeet Mohammed aangehaal wat oorspronklik in 1391 deur die Bisantynse keiser Manuel II Palaiologos gemaak is.

Alhoewel die pous later verduidelik het dat hy nie sy eie opinie in sy lesing wou uitspreek nie, het sy uitlatings tot straatoptogte in Islamitiese lande gelei. Tydens 'n ontmoeting met Islamitiese diplomate en verteenwoordigers van Moslem-gemeenskappe in Castel Gandolfo het die pous op 25 September sy respek vir die Islamitiese godsdiens beklemtoon. In Oktober 2006 het 38 Islamitiese regsgeleerdes sy verskoning aanvaar.

Optrede in Latyns-Amerika

Lande, wat Benedictus XVI besoek het.

Nog voor sy amptelike besoek aan Brasilië (9 tot 14 Mei 2007) was die regering in Brasília ontsteld oor uitlatings wat die pous oor die aborsie-kwessie in Meksiko gemaak het. Hy het begrip en steun vir Meksikaanse kerkleiers uitgespreek wat gedreig het om politici te ekskommunikeer wat 'n liberale wetgewing ten opsigte van aborsie steun.

In Brasilië het Benedictus XVI beweer dat die kerstening tydens die kolonisasie van Latyns-Amerika nie aan die inheemse bevolking opgedwing is nie, maar dat hulle self Christene wou word.

Uitlatings oor homoseksualiteit

Die pous se toespraak tydens die Kersfees van 2008 het onder meer beledigende woorde vir die LGBT-gemeenskappe bevat en is deur teoloë en politici in Duitsland en ander lande skerp veroordeel en as haatspraak beskryf.

Rehabilitasie van tradisionaliste

Die rehabilitasie van vier tradisionalistiese biskoppe, waaronder Richard William, wat onder meer met sy ontkenning van die Joodse volksmoord deur die Nazi's opspraak gewek het, is vroeg in 2009 deur Duitse teoloë en die biskop van Rottenburg-Stuttgart, Gebhard Fürst, skerp veroordeel.

Saligverklarings

• 1 Mei 2011: Pous Johannes Paulus II.

Eksterne skakels

• (de) Pous Benediktus XVI
• (en) Pous Benediktus XVI Kuns
• (en) Geboortehuis van Pous Benedictus XVI, (Joseph Alois Ratzinger) in Marktl (Kaart vanuit WikiMapia)

Voorafgegaan deur Johannes Paulus II

Pous (Pontifex Maximus) 2005 - 2013

Opgevolg deur --