Michelangelo

Michelangelo
Krytportret deur Daniele de Volterra
Doopnaam	Michelangelo di Lodovico Buonarroti Simoni
Geboorte	6 Maart 1475; naby Arezzo, Italië
Afsterwe	18 Februarie 1564; Rome, Italië

Michelangelo di Lodovico Buonarroti Simoni (1475 – 1564), beter bekend as slegs Michelangelo, was 'n Italiaanse skilder, beeldhouer, argitek, digter en ingenieur wat tydens die Renaissance aktief was. Michelangelo het homself hoofsaaklik met kunssinnige vakgebiede gebesig, maar nou en dan ook ander vakgebiede betree. Sy vaardigheid was sodanig, dat hy dikwels beskou word as meedinger vir die titel argetipiese Renaissance-man, saam met Leonardo da Vinci.

Tydens sy lang lewe het Michelangelo reuse bydraes tot sy gekose vakgebiede gelewer: indien mens die inhoud van sy korrespondensie, sketse en ander nie-kunssinnige werke wat steeds bestaan in ag neem, is hy die beste gedokumenteerde kunstenaar van die 16de eeu. Twee van sy bekendste beeldhouwerke, die Pietà en Dawid, is voor sy dertigste verjaardag geskep. Michelangelo het nie 'n hoë dunk van skilderkuns gehad nie, maar tog twee van die invloedrykste fresko's in die geskiedenis van Westerse kuns geskep: tonele uit Genesis op die plafon en Die Wederkoms op die altaarmuur van die Sikstynse Kapel in Rome. Het het later in sy lewe die koepel van die Basilika van Sint Peter ontwerp (ook in Rome) en 'n omwenteling in die klassieke argitektuur teweeg gebring deur sy gebruik van pilasters wat twee verdiepings gestrek het.

Die Skepping van Adam op die plafon van die Sikstynse Kapel

Michelangelo was uiters bekend in sy eie tyd: hy is die eerste Westerse kunstenaar wie se biografie reeds tydens sy leeftyd gepubliseer is. Inderdaad, twee biografieë is tydens sy leeftyd gepubliseer: een deur Giorgio Vasari, wat voorgestel het dat Michelangelo die toppunt van kunssinnige prestasie sedert die begin van die Renaissance was. Vasari se siening sou vir die volgende eeue in kunsgeskiedenis voortleef. In sy leeftyd is daar ook na Michelangelo verwys as Il Divino ("die goddelike/hemelse een").