Bethanie

Kiesafdeling Berseba in Karas

Bethanie, Namibië
ǀUiǂgandes (Nama) • Bethanien (Duits)

Oppervlak	- vk km
Gestig op	1814/1815
Bevolking	9 286
Bevolkingsdigtheid	-/vk km
Administratiewe verdeling	Karas
Burgemeester	-
Tydsone	Winter- en somertyd: UTC+1/+2
Koördinate	22.29°S, 17.09°O

Bethanie is 'n nedersetting in die suide van Namibië wat aan die C14-pad tussen Goageb en Walvisbaai, sowat 100 kilometer wes van Keetmanshoop geleë is. Bethanie is 1 000 meter bo seevlak geleë en het 'n bevolking van 9 300. Die dorp word as een van die oudste nedersettings in die land beskou.

Geskiedenis

Bethanie het 'n sterk fontein - in Afrikaans Klipfontein genoem - wat saam met sy weivelde reeds vroeg - vermoedelik in 1804 - as trekpleister vir die vestiging van Orlam-Nama's in die gebied gedien het. In die vroeë 19de eeu het die eerste sendelinge vanuit die Kaapkolonie na die noorde begin trek en op hulle pad ook 'n aantal sendingstasies gestig. Bethanie het sy ontstaan aan sendelinge van die Londense Sendinggenootskap te danke, maar vanweë die tekort aan sendelinge - en moontlik ook as ingevolge die destydse samewerking met die Rynse Sendinggenootskap - is die Duitse sendeling Johann Hinrich Schmelen na Bethanie gestuur om die plaaslike Nama te kersten. Hy het die nedersetting, waar hy homself saam met 'n gemeenskap Orlams uit Pella gevestig het, Bethanien genoem - na die Bybelse dorp waar Jesus van Nasaret volgens oorlewering die doop ontvang het.

'n Jong man van die Bethaniër-stam

Die woonhuis, wat Schmelen in die dorp opgerig het, word as die eerste steengebou terplaatse beskou, en dit is heel waarskynlik ook die oudste gebou in Namibië. Die Schmelenhaus is intussen tot nasionale monument verklaar en huisves 'n museum oor die sendelinggeskiedenis van Bethanie.

Pastoor Schmelen het met 'n Nama-vrou, Zara, getrou wat hom by die aanleer van die Nama-taal en die vertaling van dele van die Nuwe Testament behulpsaam was. Die sendingwerk het egter geblyk om 'n moeilike taak te wees. So het die Nama voortdurend rooftogte teen Herero's uitgevoer, en baie van hulle het die Duitse sendeling met wantroue bejeën. Uiteindelik is hy selfs verantwoordelik gehou vir 'n langdurige droogte en 'n verwoestende sprinkaanplaag. Schmelen het sy afskeid geneem en Bethanie saam met sy vrou en vier kinders in 1828 verlaat. Enkele jare later is die plaaslike sendingstasie deur die Rynse Sendinggenootskap oorgeneem wat in 1859 'n kerk met twee torings in die dorp laat bou het.

Later is nog meer kerkgeboue rondom die Schmelenhaus opgerig waarvan die twee oudstes en in argitektoniese opsig merkwaardigstes deur Evangelies-Lutherse gemeentes gebruik word. Meestal dien Afrikaans as preektaal. Die Nama-gemeente staan bekend vir sy indrukwekkende kerkgesang. Die plaaslike NG gemeente het in 1938 van Keetmanshoop afgestig en word tans in kombinasie met Maltahöhe bedien.

Die huis van Nama-hoof Josef Frederiks staan bekend as die plek waar Heinrich Vogelsang op 1 Mei 1883 in opdrag van die Bremense koopman Adolf Lüderitz land gekoop het - Angra Pequeña en sy onmiddellike omgewing, die bakermat van die latere hawestad Lüderitz asook die Duitse kolonie Suidwes-Afrika.

Deesdae speel Bethanie 'n belangrike rol as kommersiële sentrum vir boere in die omgewing.

Sien ook

• NG gemeente Bethanie