Nywerheid

'n Industriële gebied

Industrie (van Latyns Industria, "bedrywigheid", "ywer") verwys na die produksie van goedere in 'n ekonomie. Dit word gekenmerk deur die vervaardiging en verwerking van materiële goedere of artikels in fabrieke en ondernemings. Dit word verder gekenmerk deur 'n hoë graad van meganisering en outomatisering (industrialisasie genoem), in teenstelling tot die ambagtelike vorm van produksie.

Tydens die Industriële Revolusie het die vervaardigingsbedryf 'n belangrike sektor van produksie en arbeid in Europese en Noord-Amerikaanse lande geword. Dit het plaasgevind deur vinnige, opeenvolgende vooruitgang in tegnologie, soos die produksie van staal en steenkool.

Na die Industriële Revolusie is ongeveer 'n derde van die wêreldekonomie van vervaardigingsbedrywighede afgelei. Verskeie ontwikkelde lande en baie ontwikkelende lande (soos die Volksrepubliek van Sjina, Indië, ens) se ekonomieë is van die vervaardigingsbedryf afhanklik. Hierdie industrieë, asook die lande waar dit voorkom, is in 'n komplekse web van interafhanklikheid verweef.

Daar is sekere sektore wat nie aan die tegniese definisie van 'n industrie voldoen nie, maar tog as industrieë aangedui word. Voorbeelde hiervan is die toerisme-industrie, musiekindustrie, vermaaklikheidsindustrie, sagteware-industrie, ens.