Qin-dinastie

Die Qin-dinastie omstreeks 120 v.C.

Die Qin-dinastie (朝, Qín Cháo; 221-206 v.C.) was die eerste keiserlike dinastie van Sjina en het geduur van 221 tot 206 v.C. Die dinastie is gestig ná die verowering van ses ander state deur die staat Qin; die stigter was Qin Shi Huang, die eerste keiser van ’n verenigde Sjina. Die staat Qin se naam kom van sy hartland, in die hedendaagse Gansu en Shaanxi.

Geskiedenis

Die krag van die staat is in ’n groot mate verhoog deur legalistiese hervormings in die 4de eeu v.C.. Die Qin het in die middel en laat 3de eeu v.C. ’n reeks vinnige verowerings geloods om eers die magtelose Zhou-dinastie en eindelik nog ander strydende state oor te neem. So het hulle die hele Sjina verenig.

Tydens sy bewind oor Sjina het die Qin probeer om ’n keiserlike staat te verenig deur ’n hoogs gestruktureerde politieke mag en ’n stabiele ekonomie wat ’n groot weermag kon onderhou. Die sentrale regering het die rol van die aristokrate en grondeienaars verklein en regstreekse administratiewe beheer oor die boere, die grootste deel van die bevolking, uitgeoefen. Dit het ’n groot mannekrag tot gevolg gehad, asook ambisieuse bouprojekte soos ’n muur aan die noordelike grens (vandag bekend as die Groot Muur). Die Qin-dinastie het ook verskeie hervormings ingestel, soos die geldeenheid, die standaardisasie van gewigte en eenhede en ’n eenvormige skryfstelsel. Om kritiek te beperk en alle inligting oor ou dinastieë te vernietig, is boeke in 213 v.C. verbrand en 460 Konfusiaanse geleerdes lewendig begrawe. Die weermag was ook rewolusionêr in die sin dat dit die modernste wapens, vervoer en taktieke gebruik het.

Ondanks die dinastie se militêre mag het dit nie lank geduur nie. Toe die eerste keiser in 210 v.C. dood is, het twee van sy vorige raadgewers sy seun op die troon geplaas in ’n poging om die administrasie van die hele dinastie deur hom te beïnvloed en beheer. Die raadgewers het egter vasgesit en dit het tot hul eie dood en dié van die tweede Qin-keiser gelei. ’n Paar jaar later het ’n volksopstand uitgebreek wat die ryk verswak het. Dit is verower deur ’n Chu-luitenant, wat die Han-dinastie gestig het.

Ondanks sy kort bestaan het die Qin-dinastie daaropvolgende Sjinese ryke beïnvloed, veral die Han, en daar word geglo die Europese en Afrikaanse naam vir Sjina kom van hulle af.

Eksterne skakels

• Wikimedia Commons het meer media in die kategorie Qin-dinastie.
• Hierdie artikel is vertaal uit die Engelse Wikipedia