Merino

'n Trop merinoskape

'n Merinoram

Die merinoskaap is een van die bekendste skaaprasse ter wêreld. Merino's is veral bekend vir die kwaliteit van hulle wol, hoewel hulle ook vir vleisproduksie aangehou word. Daar is twee soorte merinoskape: die met lang spiraalvormige horings (wat naby die kop groei) en die sonder horings (soms is klein stompies sigbaar). Die ooie dra egter nie horings nie (net die ramme).

Die ras is oorspronklik van Alentejo in die suide van Portugal, vanwaar dit aan Spanje bekendgestel is. Die wol van die skaap was reeds in die Middeleeue hoog aangeskryf. Vandag word merino's steeds as een van skaaprasse met die mooiste en sagste wol beskou.

Danksy die skaap se geplooide vel produseer dit ongeveer vyf kilogram wol per jaar. 'n Merino groei gemiddeld tien keer soveel haartjies per vierkante sentimeter as ander skape. Hulle is egter nie net vir die hoeveelheid wol wat hulle lewer bekend nie, maar ook vir die wol se kwaliteit. Die wol het 'n fyn tekstuur en is daarom vir verskeie toepassings geskik. Dit word onder meer vir gordyne en die maak van klere aangewend. Omdat dit nie krapperig of jeukerig is nie, word die wol veral vir sportdrag gebruik.

Merino's moet minstens een keer per jaar geskeer word omdat hulle wol aanhou groei. Skape wat nie gereeld geskeer word nie, kan hitte-uitputting, probleme met mobiliteit en blindheid ondervind.

Die Suid-Afrikaanse Vleismerino is 'n dubbeldoelras wat vir beide sy vleis en wol geteel is. Die wol se kwaliteit is nie so goed soos die van wolmerino's nie, maar die skaap het 'n groter karkas wat vleisproduksie verhoog.

Merino's is uiters aanpasbaar en floreer op yl grasveld. Die ooie kan drie keer elke twee jaar lam (elke agt maande).

Eksterne skakels

• Wikimedia Commons het meer media in die kategorie Merino.