NG gemeente Belfast

Ds. J.H.B. Strofberg.

Die NG gemeente Belfast is ’n gemeente in die Nederduitse Gereformeerde Kerk se Oostelike Sinode. Buiten die hoofkerk op Blefast behoort die kerkgebou van die voormalige NG gemeente Dullstroom ook aan die gemeente nadat Dullstroom by Belfast ingelyf is.

Stigting

Hierdie gemeente, wat die naam van die dorp Belfast dra wat deur ’n man van Ierse afkoms aangelê is, is in die jaar 1899 gestig. Die nuwe dorp was geleë in die distrik Lydenburg, ongeveer op die skeiding tussen die Hoëveld en die Laeveld. Met sy stigting het die gemeente egter ’n deel van die distrike Lydenburg, Middelburg en Carolina beslaan.

Eerste leraars

Aangesien die stigting in dieselfde jaar plaasgevind het as die uitbreek van die Tweede Vryheidsoorlog en die eerste beroepe leraar, ds. J.C. Hefer, bedank het, het sy vakant gebly tot in 1904. Die derde beroep wat in 1904 uitgebring is, was op ds. H.T. Gonin, wat dit dan ook aangeneem het. Hy het die gemeente vrome getrouheid tot September 1913 bedien, toe hy as dosent na die Sendinginstituut op Wellington gaan. Sy opvolger was ds. J.H.M. Stofberg.

Kerkbou

In 1894 is die hoeksteen gelê van die gebou wat as skool sowel as kerk moes dien. Lank is die behoefte aan ’n groter kerk gevoel, maar eers in April 1914 is die hoeksteen van die huidige kerk gelê deur die, volgens Ons Kerk Album, “onvergetelike, en door zijn volk innig beminde” kmdt.genl. Christiaan Beyers. Ds. Stofberg het die kerk ingewy. Danksy die hartlike samewerking van die gemeente en milde skenkings van vele, kon die skuld bimne twee jaar betyds afbetaal word, en dit nieteenstaande die swaar tye veroorsaak deur die Eerste Wêreldoorlog. Weens die oorlog kon nie toring en galery egter nie dadelik aangebring word nie.

Bronne

• (nl) Maeder, ds. G.A. en Zinn, Christian. 1917. Ons Kerk Album. Kaapstad: Ons Kerk Album Maatschappij Bpkt.