Worcester

Hierdie artikel handel oor die dorp in Suid-Afrika. Vir die dorp in Engeland, sien Worcester, Engeland.

Worcester
Dorp
Worcester
Koördinate: 33°38′42″S 19°26′37″O
Land	Suid-Afrika
Provinsie	Wes-Kaap
Distriksmunisipaliteit	Kaapse Wynlande
Plaaslike Munisipaliteit	Breedevallei
Stigting	1820
Oppervlak
• Totaal	73,2 km2 (28,3 vk. myl)
Hoogte	223 m (732 ft)
Bevolking
• Totaal	78 900
Tydsone	UTC+2 (SAST)
Poskode	6850

Worcester is een van die groter dorpe van die Wes-Kaap, in die Breederiviervallei, 121 km oos-noordoos van Kaapstad en 52 km noordwes van Robertson. Dit is geleë aan die rant van die Hexrivierberge en is een van die mooiste geleë dorpe in Suid-Afrika. Die N1 nasionale pad gaan deur die dorp.

Geskiedenis

Worcester is in 1820 gestig op die plase Langerug en Roodewal (sommige bronne Roodedraai) en word 'n munisipaliteit in 1842. Dit is vernoem deur lord Charles Somerset, indertydse goewerneur van die Kaap, na sy broer, die markies van Worcester. Die dorp is bekend om sy skole vir dowes en blindes. Die NG gemeente is in 1821 gestig en vandag is daar, benewens die moedergemeente, nog ses NG gemeentes.

Distrik

Die distrik is 4 139 km² groot en lewer ongeveer 25% van die land se druiwe. Hier word meer wyn en brandewyn gemaak as in enige ander distrik in die land.

Dorps- en afdelingsraadswapens

Munisipaliteit (1) — Die munisipale raad het voor 1931 'n wapen aangeneem : In blou, 'n goue valhek met kettings op 'n rooi en silwer wrong. Die valhek kom uit die Somerset-familiewapen.

Munisipaliteit (2) — Die raad het 'n nuwe wapen in 1948 aangeneem. Dit is jare later (in 1983) by die Buro vir Heraldiek geregistreer : Gevierendeel van swart en rooi, 'n goue valhek gespyker van blou; op 'n golwende silwer skildhoof, drie blou skywe, elk belaai met 'n goue fleur-de-lis. Die helmteken was 'n goue halwe leeu met 'n horing van oorvloed. Die wapenspreuk was "Mutare sperno".

Afdelingsraad (1) — Op 'n stadium het die afdelingsraad (die plaaslike owerheid vir die landelike gebiede buite die munisipale grense) die voormalige munisipale wapen (d.w.s. munisipale wapen (1)) oorgeneem.

Afdelingsraad (2) — Die afdelingsraad het in 1974 'n nuwe wapen by die Buro vir Heraldiek geregistreer : In groen, 'n hoekige skuinsbalk van silwer in die vorm van 'n letter W tussen twee penninge van goud. Die helmteken was twee druiwetrosse an weerskante van 'n rooi stok. Die wapenspreuk was "Fructu noscitur".

Zwelethemba — Die Swart woongebied Sidesaviwa het van 1978 tot 1996 sy eie plaaslike owerheid gehad. Die dorpskomitee het in 1989 'n wapen by die Buro vir Heraldiek geregistreer : Tweelingkepersgewys deursnede, rooi en swart, twee silwer aanstotende kepers vergesel in die skildhoof van 'n byekorf, die skildvoet getralie, alles goud. Die helmteken was 'n swart muurkroon.

Bron

• Op Pad in Suid-Afrika. B.P.J. Erasmus. 1995. ISBN 1-86842-026-4

• 
  Worcester se NG moederkerk.
• 
  Karoo Nasionale Botaniese Tuin.
• 
• 
• 

Sien ook

• Gereformeerde kerk Worcester
• Worcester (kiesafdeling)
• Lys van dorpe in Suid-Afrika

Eksterne skakels

• Worcester info
• De la Bat-skool