Emmarentia

Lourens en Emmarentia Geldenhuys en hul gesin. Die voorstad is na haar genoem.

Emmarentia is 'n boomryke, gevestigde en betreklik gegoede voorstad van Johannesburg, Gauteng, Suid-Afrika. Dis sowat 4 km noord van die stadsaal geleë. Dit word begrens deur Linden in die noorde, Greenside in die ooste, Melville in die suide en Roosevelt Park in die weste.

Die voorstad is op die welgestelde politikus en weldoener Lourens Geldenhuys, na wie die Laerskool Louw Geldenhuys in die aangrensende Linden genoem is, se plaas Braamfontein aangelê en genoem na sy vrou, Emmarentia. Die voorstad is op 28 April 1937 geproklameer en Uitbreiding 1 op 4 Julie 1945. Die ou pad na Rustenburg, wat later die naam Barry Hertzoglaan gekry het, skei Emmarentia en Greenside.

Demografie

Die voorstad, in die vorm van 'n agterstevoor sewe, beslaan vir sensusdoeleindes 3,81 km² en het in 2011 5 116 inwoners gehad van wie 41 persent wit was, 27 persent Indies en 26,1 persent swart. Tien jaar vroeë was die bevolking in 'n ietwat groter gebied wat destyds ook die Johannesburgse Botaniese Tuin ingesluit het, 4 452, van wie 56,1 persent wit was, 28 persent swart en 13,4 persent Indies. Engels was in albei gevalle die grootste huistaal, maar terwyl 60,2 persent dit in 2001 as huistaal aangedui het, was dit in 2011 die huistaal van 67,2 persent van die inwoners. Afrikaans het teruggesak van die huistaal van 12,6 persent van die inwoners in 2001 tot 10,2 persent in 2011.

Bronne

• Potgieter, D.J. (red.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).