Eid-oel-Adha

Gebede tydens Eid-oel-Adha in die At-Tin-moskee in Indonesië.

Eid-oel-Adha (Arabies: عيد الأضحى ʿīd al-aḍḥā), of die Offerfees, is die tweede van twee Islamitiese feeste wat elke jaar wêreldwyd gevier word, en word beskou as die heiligste van die twee. Dit is ter viering van Ibrahim (Abraham) wat opdrag van God gekry het om sy seun te offer as teken van onderdanigheid, maar voordat hy dit kon doen, het God tussenbeide getree en sy engel Gabriël gestuur om vir Abraham te sê sy offer is reeds aanvaar. Die vleis van die offer word in drie dele verdeel: Een deel word deur die gesin gehou, ’n ander deel word aan vriende, bure en familie gegee en die derde deel gaan na behoeftiges.

In die Islamitiese kalender, wat ’n maankalender is, val Eid-oel-Adha op die 10de dag van Dhu'l Hidjdja, die laaste maand. Vierings begin nadat die pelgrims in Mekka wat aan die hadj deelneem, van Berg Arafat af kom. Dit duur vier dae, tot met sonsondergang op die 13de Dhu'l Hidjdja. In die Gregoriaanse kalender, ’n sonkalender, verskil die datum van jaar tot jaar – dit is elke jaar 10 tot 11 dae vroeër.

Die dae van Eid word in die hadit uitgesonder as "dae van herinnering" en word as die heiligste dae in die Islamitiese kalender beskou.

Die ander groot Islamitiese fees is Eid-oel-Fiter.

Eksterne skakels

• Muttaqi, Shahid ‘Ali. "The Sacrifice of "Eid al-Adha"". Animals in Islam.
• Islamic, Dhul-Hijjah ‘Month. ""Eid al-Adha"". Islamic Festival.

• Wikimedia Commons het meer media in die kategorie Eid-oel-Adha.
• Hierdie artikel is vertaal uit die Engelse Wikipedia