Abraham Coetsee

Ds. en mev. Coetsee en hul eersteling, Hennie.

Ds. Abraham Jacobus Coetsee (Bethulie, Oranje-Vrystaat, 12 April 1929 – 26 Julie 2015) was predikant in drie gemeentes van die Gereformeerde Kerk: Koedoesrand 1957–1961, Colesberg 1961–1968 en Meyerton 1968–1994.

Abraham Coetsee is gebore in die Suidwes-Vrystaat as die jongste seun van Hendrik Johannes Coetsee en Hester Aletta (geb. Coetsee). As plaasseun in sy kinderjare begin hy sy skoolopleiding in 'n plaasskooltjie op die plaas Groenpoortjie in die distrik Venterstad, 22 km van die dorp af. Dit sou egter vir 'n kort tydjie wees, want vanaf sub. B (gr. 2) tot st. 2 het hy skoolgegaan op Venterstad en bly in die koshuis. Hierna het sy ouers na Bethulie verhuis, alwaar hy sy skoolopleiding verder ontvang en in die jaar 1947 gematrikuleer het.

In 1948 het hom ingeskryf aan die PU vir CHO as B.A.-student. Vanaf sy kinderjare wou hy vir predikant gaan studeer, en met dié doel voor oë het hy dan ook sy universiteitsloopbaan begin. Einde 1948 het sy ouers na Bloemfontein met die gevolg dat hy die volgende jaar aan die UOVS ingeskryf het om sy studie voort te sit. In sy graadjaar het hy ook die pos van advertensievertaler vir Die Landbouweekblad by die Nasionale Pers Bpk. in Bloemfontein aanvaar. Hierna het hy sy studie voortgesit deur middel van aandklasse aan Kovsies. Toe Die Landbouweekblad in hierdie jaar verskuif na Kaapstad, kon hy nie meegaan nie as gevolg van sy studie. Gevolglik het hy klerk by die Nasionale Boekhandel Bpk. in Bloemfontein geword en skryf aan die einde van die jaar die graad B.A. met Afrikaans-Nederlands en sosiologie as hoofvakke en staatsleer as byvak. Intussen het 'n stryd in sy binneste ontstaan, en om tot helderheid en lig te kom, het hy 'n onderwyspos aan 'n plaasskool in die distrik Boshof aanvaar. Nadat hy reeds die vorms ingevul het om hom aan die fakulteit van opvoedkunde van die UOVS te bekwaam, het daar lig en helderheid gekom. Die volgende jaar het hy ingeskryf aan die UOVS vir die vakke Hebreeus en Latyn en 'n pos by die Nasionale Beenmeelfabriek Bpk. in Bloemfontein aanvaar. Deur middel van aandklasse het hy aan die einde van die jaar in dié twee vakke geslaag. In 1953 het hy teruggekeer na Potchefstroom waar hy sy studie voortgesit het, toe as student in die teologie. Kort voor die eindeksamen sou begin, het hy ’n noodoperasie ondergaan weens sy blindederm sodat hy eers twee weke ná die ander studente beroepbaar gestel kon word.

Op 1 Januarie 1957 het ds. Coetsee in die huwelik getree met mej. Hester Lusya Coetsee, dogter van mnr. en (ten tyde van die huwelik wyle) mev. C. J. Coetsee van die distrik Bloemfontein, en onderwyseres aan die Dr. Viljoenskool in Bloemfontein. Hul eersteling was ’n seun, Hendrik Johannes. Sy eerste beroep het hy ontvang na die kombinasie Koedoesrand-Magol, waar hy in Februarie 1957 bevestig is. In 1961 het die gesin na Colesberg gegaan en in 1968 na Meyerton, waar ds. Coetsee in die bediening gestaan het tot hy sy emeritaat in 1994 aanvaar het.

Bron

• (af) Venter, H.J. 1959. Eeufeesgedenkalbum van die Gereformeerde kerke in die Klassis Waterberg 1859–1959. Potgietersrus: Deputaatskap vir die Gedenkalbum.
• (af) Vogel, ds. Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.