Moderne Wetenskap (boekreeks)

Moderne Wetenskap is die titel van 'n reeks van 12 boeke wat in 1962 deur Tafelberg-uitgewers gepubliseer is. Die boeke was Afrikaanse vertalings van die Engelstalige reeks Science Study Series wat onder leiding van die Physical Science Study Committee (PSSC) aan MIT die lig gesien het. Die PSSC het hom dit ten doel gestel om wetenskapsonderrig in die Verenigde State te moderniseer en te verbeter, en dit het deel uitgemaak van die opskuddings in Amerikaanse onderrig wat op die onverwagte lansering van Spoetnik deur die Sowjetunie gevolg het. Die Amerikaanse publiek en regering was erg geskok dat die Russe blykbaar die leiding op wetenskaplike gebied oorgeneem het, en 'n program is van stapel gestuur om laer- en hoërskool wetenskapsonderrig te verbeter. Die PSSC was nou hierby betrokke gewees en die Science Study Series was 'n reeks boeke, geskrewe deur voorste fisici, wat die publiek en onderwysers op 'n informele manier aan gevorderde wetenskap probeer blootstel het.

Die vertaling van die reeks is deur 'n groep akademici aan meestal Afrikaanse universiteite behartig. Die volgende titels is uitgegee:

1. Die verhaal van die Neutron, deur Donald J Hughes

2. Die woelige atoom, deur Alfred Romer

3. Die orde van die heelal, deur Hermann Bondi

4. Die diensvaardige eggo, deur Donald R Griffin

5. Seepbelle, deur Sir Charles Vernon Boys

6. Magnete, deur Francis Bitter

7. Die fisika van televisie, deur David M Lutyens en Donald G Fink

8. Versnellers, deur Raphael Littauer en Robert R Wilson

9. Michelson en die spoed van lig, deur Bernard Jaffe

10. Die geboorte van 'n nuwe fisika, deur I Bernard Cohen

11. Die ouderdom van die aarde, deur Partrick M Hurley

12. Ridder van die wetenskap, deur René Dubos