Neutronsluiter

'n Neutronsluiter is 'n toestel wat by 'n partikelversneller gebruik word om 'n bundelpyp tydelik te blokkeer sodat neutrone nie langs hom af kan ontsnap nie.

Tydens die werking van 'n partikelversneller slaan die hoëenergie partikelbundel soms teen 'n stilstaande voorwerp vas. Dit kan doelbewus gebeur, byvoorbeeld tydens 'n verstrooiings-eksperiment en tydens die opstel van die masjien, of dit onbedoeld wees, soos wanneer 'n onderdeel wanfunksioneer en die bundel per ongeluk teen die kant van die bundelpyp vasslaan. In albei gevalle word daar 'n groot aantal neutrone tydens hierdie botsings vrygestel (hulle word uit die stilstaande atome se kerne losgeslaan). Sulke neutrone is 'n vorm van ioniserende radiasie, en kan skade aan biologiese weefsel, soos mense, aanrig. Dit is dus belangrik om dan alle bundelpype wat na gebiede toe lei waar mense moontlik aanwesig kan wees tydelik met neutronsluiters te blokkeer. Indien daardie gebiede op 'n latere stadium (nadat hulle van mense ontruim is) weer vir eksperimente gebruik wil word kan die neutronsluiters weer teruggetrek word om die bundelpyp oop te maak.

Neutronsluiters bestaan gewoonlik uit 'n groot blok lood of staal, wat meganies rondgeskuif kan word sodat dit die bundelpyp of heeltemal blokkeer, of heeltemal oop laat. Hierdie meganisme word dan in 'n lugdigte omhulsel geplaas sodat geen lug in die bundelpyp kan inkom tydens die oop en toemaak nie, aangesien dit belangrik is om die vakuum in die bundelpyp te bewaar.