N1 (Suid-Afrika)

Hierdie artikel bevat inligting oor die N1, een van Suid-Afrika se hoofpaaie.

N1 Nasionale Pad

Padteken van die N1.

Die N1 word in rooi aangedui.

Die beginpunt van die N1 sowel as die N2 is Nelson Mandela-boulevard in Kaapstad.

Die N1 naby Vanderbijlpark.

Die N1 soos mens Kaapstad inry, net verby Century City.

Die N1 wat deur Midrand loop op pad na Johannesburg toe.

Die N1 is een van Suid-Afrika se 17 nasionale paaie. Dit is die belangrikste hoofpad in Suid-Afrika, want dit verbind al die hoofstede, nl. Pretoria, Johannesburg, Bloemfontein en Kaapstad. Die pad loop dus vanaf Kaapstad, tot by Beitbrug, wat die grens met Zimbabwe is.

Wes-Kaap

Die N1 begin as 'n snelweg in Kaapstad se sentrale sakegebied, waar dit bekend staan as Nelson Mandela-boulevard, en beweeg noordoos uit die stad uit deur die metropolitaanse area (waar dit wissel tussen vier tot agt bane) tot dit Paarl bereik. Daarna ry 'n mens deur die Hugenotetonnel (wat 'n tolpad is). Na Worcester gaan die pad oor die Hexrivierpas en verby Touwsrivier. Die pad hou oos verby Matjiesfontein en Laingsburg waar die Buffelsrivier gekruis word. Sodra die Dwykarivier gekruis word swaai die pad noordoos tot by Beaufort-Wes. Net voor Beaufort-Wes sluit die N12 nasionale pad by die N1 aan. Vanaf Beaufort-Wes hou die pad noordoos tot by Drie Susters. Hier swaai die N12 weg vanaf die N1. Nou verlaat die N1 die Wes-Kaap en gaan die Noord-Kaap binne.

Spitsverkeer op die N1 tussen die Koeberg-wisselaar en die Hugenotetonnel vind op weeksdae in die oggende en in die middae plaas. Die res van die N1 in die Wes-Kaap sien spitsverkeer eerder oor bepaalde naweke of tydens sommige tydperke gedurende vakansieperiodes, en dra andersins gelykmatige verkeersvolumes.

Noord-Kaap

Die N1 hou noordoos, verby Richmond, Hanover tot by Colesberg. By Hanover word die N10 gekruis. Net ná Colesberg word die Oranjerivier gekruis en die Vrystaat binne gegaan.

Vrystaat

Vanaf die Oranjerivier hou die pad amper noordwaarts, gaan verby Springfontein, Trompsburg en Edenburg. Dit kruis dan die Rietrivier net voordat dit Bloemfontein bereik. Hier word dit weer 'n snelweg wat wes om die stad lei (Bloemfontein Wes verbypad). Net ná Bloemfontein gaan die N1 oor die Modderrivier, deur die Verkeerdevlei tolhek, ongeveer halfpad tussen Bloemfontein en Winburg. Hiervandaan gaan die pad verby Winburg. Halfpad op pad na Ventersburg word die Sandrivier gekruis. Die N1 gaan verby Ventersburg en is 'n snelweg verby Kroonstad. By Kroonstad gaan die N1 oor die Valsrivier. Net suid van die Vaalrivier word die pad weer 'n snelweg wat verby Vanderbijlpark in die Vaaldriehoek loop en Gauteng binnegaan. Waar die Vaalrivier gekruis word, is die Barrage net-net sigbaar aan die reisiger se regterkant.

Gauteng

Van die Vaalrivier word die snelweg die Kroonvaal Tolweg genoem. Dit sluit dan by die Westelike Verbypad of "betonpad" aan. Net voor dié aansluiting, sluit die N12 eers by die N1 aan. Die pad beweeg dan noord na Pretoria waar dit die besigste pad in die Suidelike Halfrond vorm, nl. die Ben Schoeman-hoofweg, wat daagliks omtrent 300 000 voertuie tussen Johannesburg en Pretoria dra. Beide die N4 en N14 nasionale paaie sluit aan by die N1. By Pretoria vorm dit die Pretoria-Oos verbypad wat tot in Polokwane (Pietersburg) verleng. Halfpad tussen Pretoria en Bela-Bela (Warmbad) word die Limpopo (provinsie) binnegery.

Limpopo

Die N1 hou reg noord, verby Bela-Bela, swaai dan noordoos, verby Kranskop en die tolhek tot by Polokwane. Die N1 kruis die Steenbokskeerkring sowat 53km noord van Polokwane. Die pad gaan dan aan na Louis Trichardt (Makhado) en gaan oor die Soutpansberg via Wyliespoort, deur Musina voor dit by Beitbrug uitkom. By Beitbrug word die Limpoporivier gekruis. Na Beitbrug, word die pad nie meer die N1 genoem nie, omdat dit in Zimbabwe in beweeg.

Sien ook

• Nasionale paaie in Suid-Afrika

Eksterne skakels

• National Roads Agency SA
• Shell Info Site