Stellenbosch

'n Uitsig oor Pleinstraat na Bothmaskop in die ooste

Stellenbosch, ewe goed bekend as die Eikestad, is die tweede-oudste Europese nedersetting in Suid-Afrika naas Kaapstad, en is geleë in die Wes-Kaapprovinsie.

Dit is sowat 50 Kilometer vanaf Kaapstad en het 'n bevolking van nagenoeg 90 000 (opgeneem in die jaar 2000), uitsluitend studente. Hierdie skatting is gebasseer op formeel-behuisde inwoners, en is dus heel moontlik ondergeskat, omdat die Stellenbosch-omgewing ook 'n aantal informele nedersettings het. Stellenbosch is besig om vinnig saam te smelt met aanliggende nedersettings.

Die dorp is ook die tuiste van die Universiteit van Stellenbosch, wat as die Stellenbosch Gymnasium in 1866 gestig is.

Wyn

Wingerde rondom Stellenbosch

Die valleie om Stellenbosch, Paarl en Franschhoek vorm die Kaapse Wynlande, die grootste van die twee hoof aanbougebiede van wyn in Suid-Afrika. Die Suid-Afrikaanse wynindustrie produseer sowat 10 miljoen hektoliter wyn jaarliks, en Stellenbosch is die sentrum vir navorsing in dié gebied.

Die Stellenbosch Wynroete, gestig in 1971, is wêreldbekend en 'n gereelde toeristebestemming.

Die area het 'n Middellandse Seeklimaat (of winterreënklimaat), en is geleë aan die begin van die Kaapse plooiberge, wat uiters gepaste grond vir wynverbouing bied. Druiwe word dus ook primêr verbou vir wynproduksie, en nie as tafeldruiwe nie.

Geskiedenis

Voorkant van die Gotiese styl NG Moedergemeente aan die punt van Kerkstraat

Die dorp self is gestig in 1679 deur die Kaapse Goewerneur Simon van der Stel, wat dit na homself vernoem het; letterlik "(Van der) Stel se Bos". Volgens van der Stel se dagboek is die dorp op 'n eiland in die Eersterivier gevestig. Die ligging van hierdie eiland kan nog bespeur word tussen die Meulstroom en die Eersterivier self. Nog net die boonste deel ven die Meulstroom vloei in sy oorspronklike koers. Die Eersterivier is so genoem omdat dit die eerste rivier was wat 'n mens teëgekom het soos wat jy van die Kaap af gereis het.

Sodra die eerste inwoners aankom, word druiwe aangeplant in die vrugbare valleie rondom die dorp, wat die wortels vir die Suid-Afrikaanse wynbedryf gevestig het.

Die dorp groei só vinnig dat dit 'n onafhanklike plaaslike owerheid in 1682 word, en word 'n magistraatsetel wat 25,000 km² beheer in 1685.

Om in die Kaapse kolonie se timmerhoutbehoeftes te voorsien, begin Simon van der Stel en sy seun Willem Adriaan duisende eike in onder meer Stellenbosch aan te plant. Die oudste eikebome in die stad is meer as 200 jaar oud en tot nasionale gedenkwaardighede verklaar.

Skakels na buite

• Amptelike Stellenbosch Webwerf, sluit ook 'n aantal fotos en kaarte in