Botox

'n Botox-inspuiting word toegedien.

Botox is ’n produk (handelsmerk) wat die spiere laat verslap. Dit kan byvoorbeeld in die vel rondom iemand se oë ingespuit word sodat fyn plooitjies verdwyn en die vel jonger lyk.

Botox word van botulinumtoksien (Clostridium botulinum-toxine of BTX) gemaak. Dit is 'n neurotoksiese gif wat deur die bakterie Clostridium botulinum geproduseer word. Ander bakterieë wat botulinumtoksien kan produseer is C.butyricum, C.baratii en C.argentinense. Dit is 'n proteïen wat op senuweeselle inwerk. Voedsel wat met hierdie bakterieë besmet is kan, deur die teenwoordigheid van botulinumtoksien, botulisme veroorsaak.

Botulinumtoksien is die mees dodelike akute gifstof bekend. 'n Dosis van slegs 0,2 ng/kg binneaars of binnespiers en 10-13 ng/kg wanneer ingeasem is dodelik vir mense. Dit word egter in verdunde vorm vir mediese en kosmetiese gebruike aangewend.