Samuel Cunard: Verskil tussen weergawes
kNo edit summary Etiket: 2017-bronwysiging |
k Geboorte- en sterftejaarkategorieë bygevoeg |
||
| Lyn 45: | Lyn 45: | ||
[[Kategorie:Kanadese entrepreneurs]] |
[[Kategorie:Kanadese entrepreneurs]] |
||
[[Kategorie:Geboortes in 1787]] |
|||
[[Kategorie:Sterftes in 1865]] |
|||
Wysiging soos op 05:00, 19 November 2017
Samuel Cunard | |
|---|---|
 Samuel Cunard | |
| Gebore | 21 November 1787 |
| Sterf | 28 April 1865 (op 77) |
| Nasionaliteit | Brits-Kanadees |
| Beroep | Skeepvaartmagnaat |
| Eggenoot | Susan Duffus |
| Kinders | 9 |
| Ouer(s) | Abraham Cunard en Martha Murphy |
Sir Samuel Cunard, 1ste Baronet (* 21 November 1787 in Halifax, Nova Scotia; † 28 April 1865 in Kensington, Londen, Engeland), was 'n Kanadese skeepvaartmagnaat wat bekendheid verwerf het as stigter en naamgewer van die Britse redery Cunard Line - die eerste redery ter wêreld wat gereelde vaarte op die transatlantiese roete aangebied het. Cunard se eerste passasierskip op dié roete, die RMS Britannia, het haar nooiensvaart op 4 Julie 1840 vanuit Liverpool onderneem.
Samuel Cunard is gebore as die seun van 'n baastimmerman en houthandelaar wat gedurende die Amerikaanse Rewolusie na Brits-Noord-Amerika gevlug en hom in Halifax gevestig het. Samuel het tot die saak van sy vader toegetree, 'n houtonderneming met belange in uiteenlopende bedrywe soos walvisvangs, steenkool, yster en skeepvaart waarmee hy reeds in die 1830's 'n groot fortuin verdien het. Saam met Enos Collins het hy in 1825 die bankonderneming Halifax Banking Company gevestig.[1]
Sy skeepvaartbedrywighede het veral op seilskepe gesteun, alhoewel as aandeelhouer van die houtratboot Royal William (wat in 1833 geskiedenis geskryf het met sy hoofsaaklik stoomgedrewe transatlantiese vaart) ook ervaring opgedoen het met vroeë stoomboottegnologie. In 1839 het hy vir 'n Britse regeringskontrak getender om 'n gereelde posbootdiens op die Noord-Atlantiese roete tussen Liverpool en Halifax, Quebecstad en Boston in te stel - vir 'n jaarlikse bedrag van £55 000 oor 'n tydperk van tien jaar.
Die tender was suksesvol, en nog in dieselfde jaar het Cunard, saam met vennote in Glasgow en Liverpool, die redery British and North American Royal Mail Steam Packet Company as historiese voorloper van die Cunard Line gestig. Cunard se eerste seilskip het reeds in Mei 1840 vertrek, maar eers met die Britannia, wat vir haar vaart na Halifax en Boston 14 dae en agt ure benodig het, het die gereelde posdiens tussen die Verenigde Koninkryk en Noord-Amerika begin.
In die vroeë 1840's het Cunard se sake in Nova Scotia en Nieu-Brunswyk deur moeilike tye gegaan, terwyl sy skeepvaartonderneming steeds gefloreer het danksy Cunard se voortreflike bestuur en 'n aantal tegniese innovasies. Vanaf 1855 het dit op ysterskepe gesteun, terwyl skepratte in die vroeë 1860's deur skroewe vervang is. Strawwe Amerikaanse mededinging het die redery genoodsaak om Halifaxhawe vanaf 1867 as gereelde bestemming in Noord-Amerika deur New York te vervang. Die roete na Kanada is eers kort voor die Eerste Wêreldoorlog hervat. Later het Montrealhawe Cunard se Kanadese bestemming geword totdat ook dié roete weens strawwe mededinging deur lugrederye uiteindelik nie meer bedien is nie.
Cunard het hom in Engeland gevestig om daar sy skeepvaartbelange te bestuur. Vir die dienste, wat sy vloot tydens die Krimoorlog voorsien het, is Cunard in 1859 met die adelstitel baronet vereer. Ses jaar later is hy in Londen oorlede.