Maanmaand

’n Maanmaand is ’n tydseenheid wat gebruik word om die tyd te meet tussen twee opeenvolgende kere dat die Maan in presies dieselfde posisie ten opsigte van die Aarde is. Dit kan byvoorbeeld van volmaan tot volmaan of van donkermaan tot donkermaan wees. Nes met ’n jaar die geval is, bestaan verskillende definisies, met die gevolg dat die presiese duur daarvan wissel.

Definisies

’n Maanmaand kan op die volgende vyf maniere gedefinieer word:

• Die sinodiese maand, die tydperk van die een donkermaan tot die volgende, oftewel die tyd tussen twee identiese samestande. ’n Sinodiese maand is gemiddeld 29,53059 dae lank.
• Die tropiese maand, oftewel die tyd wat die Maan nodig het om terug te keer na dieselfde ekliptiese lengte gemeet vanaf die lentepunt. As gevolg van die presessie van die nagewenings is ’n tropiese maand ietwat korter as ’n sideriese maand, ongeveer 27,32158 dae.
• Die sideriese maand, oftewel die maansomlooptyd ten opsigte van die aarde binne ’n vaste verwysingskader. Dié tydperk is 27,32166 dae en word bepaald aan die hand van die tyd wat die Maan nodig het weer verby ’n ster in die lugruim te beweeg.
• Die anomalistiese maand, oftewel die maansomlooptyd gemeet van een perigeum tot ’n volgende. Dit is die punt waarop die Maan die naaste aan die Aarde is (sien ook Apside). ’n Anomalistiese maand duur gemiddeld 27,55455 dae.
• Die drakoniese maand of knoopmaand, oftewel die tyd wat die Maan nodig het om tydens sy omwenteling die vlak van die Aarde twee keer op dieselfde plek te kruis, met ander woorde om deur dieselfde knoop te beweeg. Dié maanmaand duur ongeveer 27,21222 dae.

Maankalenders

In die Islamitiese kalender begin die maanmaand wanneer die Maan vir die eerste keer in die aand sigbaar is ná ’n donkermaan, wat tydens ’n konjunksie voorkom. In Antieke Egipte het die donkermaan begin op die oomblik dat die Maan nie meer sigbaar was voor sonsopkoms nie. Tans is die mees gebruikte kalender die Gregoriaanse kalender, waarin die duur van ’n maand nie deur die maansiklus bepaal word nie. Die Hindoekalender werk egter steeds met maanmaande.

Verwysings

• Hierdie artikel is vertaal uit die Nederlandse Wikipedia