Hoopstad

Hoopstad is 'n dorpie aan die Vetrivier in die provinsie Vrystaat, sowat 31 km suidwes van die rivier se samevloeiing met die Vaalrivier en 30 km wes van Welkom. Die dorp bedien 'n boerderystreek waarin met Afrikanerbeeste en saaigewasse, veral mielies, koring en grondbone, geboer word. Daar is ook een nywerheidsgebied naasliggend tot die nasionale pad na die Goudvelde en Bloemfontein. Die NG kerkgebou is 'n nasionale gedenkwaardigheid. Daar is 'n buiteklub wat voorsiening maak vir allerlei sportsoorte, asook ander geriewe vir rugby, tennis, swem en atletiek. Voor die nuwe munisipale bedeling in werking getree het, was die munisipale gebied 2 962 hektaar groot.

Geskiedenis

Dit is vernoem na die landmeter wat die dorp opgemeet het, A.P. Haupt, en gestig op 1 Junie 1874 op die plaas Kameeldoorns, wat deur die Oranje-Vrystaatse Volksraad vir dié doel aangekoop is. Die dorp verkry munisipale status in 1905. Hoopstad het eers as Hauptstad bekend gestaan. Die naam is later verander, omdat Hauptstad letterlik hoofstad beteken, en dit dus afbreuk aan Bloemfontein se status as republikeinse hoofstad gedoen het. Daarom word die dorp toe stad van hoop. Die NG gemeente is in 1876 afgestig en die lidmaattalle bly redelik konstant vir 'n plattelandse dorpe: in 1979 was dit 840 en meer as 'n kwarteeu later in 2006 nog 764.

Interne skakels

Moenie verwar word nie met Hopetown, 'n dorp in die provinsie Noord-Kaap.

Eksterne skakels

• Inligting oor die NG gemeente
• Voordeur, 'n werf met plaaslike nuus in Afrkaans
• 'n Kaart met Hoopstad se ligging en beperkte toeriste-inligting

Bronne

• Raper, P.E., Dictionary of South African Place Names, Lowry Publishers, Johannesburg, 1987.
• Scannell, J.P., Die Afrikaanse Kernensiklopedie, Nasionale Boekhandel Beperk, Kaapstad (et. al.), 1965.
• Kelly, Maureen, Amptelike Suid-Afrikaanse Munisipale Jaarboek, HELM Publikasies, Johannesburg, 1986.