Basin Street

Basin Street (Frans: Rue Bassin) is 'n straat in New Orleans, Louisiana. Dit loop parallel met Rampart Street een blok binnelands (of "lakeside") van die grens met die Franse Wyk (Engels: French Quarter), en loop vir vyf blokke vanaf Canal Street teen die Saint Louis-begraafplaas af. Dit draai daarna tans in die rigting van die meer en word deel van Orleans Avenue.

Die naam is afkomstig van die omdraaibekken van die Carondelet-kanaal wat voorheen langs die straat was, waar dit nou by die Munisipale Ouditorium by Orleans Avenue aansluit. 

In die laat 19de en vroeg 20ste eeu het treinspore parallel met die kanaal geloop en dan in Basin Street ingedraai en oor die "neutrale grond" (soos wat straatmediane plaaslik genoem word) tot by een van die stad se hoofspoorlynstasies op Canal Street gegaan. 

Hoewel in 'n stadium een van die stad se beste woonbuurtstrate, het dit in 1870 'n rooiligsone geword. Tussen 1897 en dieEerste Wêreldoorlog was die agterkant van Basin Street die voorkant van die Storyville-rooiligdistrik, met 'n ry spoggerige kroeë en herehuise wat aan musiek toegewy is.

Ná Storyville tot niet gemaak is, is Basin Street tydelik na North Saratoga herdoop. Die grootste deel van Storyville is gesloop en met Iberville-projekte vervang.

Basin Straat het voorheen aan die ander kant van Canal Street aangehou tot in Common Street, wat vandag Elk Place heet en ná twee blokke aan die boonste kant van Common Street Loyola Avenue word. Die ooreenstemmende straat parallel aan Rampart een blok terug aan die ander kant van Louis Armstrong-park in die Treme-woonbuurt heet Saint Claude.

Basin Street is vereer in die lied Basin Street Blues wat Spencer Williams in 1926 gepubliseer het en in 1929 deur Louis Armstrong opgeneem is; die honderde opnames van dié jazz-standaardwerk sluit ook 'n weergawe van Miles Davis van 1963 in.

Daar is 'n reeks monumente op die neutrale grond van Basin Street, insluitend standbeelde van Simón Bolívar, Benito Juárez en Francisco Morazán, en 'n metaalteken wat Storyville gedenk.